2428/2023-2024

Reiek, 21st October, 2023 : Ni 2 awh Anthurium Festival 2023 chu vawiin khan a hmanna hmun Reiek Tourist Resort-ah khar a ni ta a, Dr Renu Sharma, Chief Secretary chuan khuallian niin he hun hi a hmanpui ani.

Khuallian Dr Renu Sharma chuan Best Tourism Village in India, 2023 nihna hauh mektu Reiek khua in Anthurium Festival, 2023 a thleng chu thil inhmeh tak a nih thu sawiin Reiek khua chu a lawmpui thu a sawi a. Kum 2006 atanga Anthurium Festival hi hman tan a nih thu sawiin, Tourism Department, Horticulture Department leh Reiek khawtlangin hneh tak leh zo taka an thleng thin chu thil chhinchhiahtlak tak a ni a ti.

Chief Secretary chuan Anthurium Festival chu Mizoram chhung hmun hrang hrang bakah Mizoram pawn lam atanga khualzin hiptu pawimawh tak a ni tawh tih sawiin, mizo hnam hrang hrang nunphung leh zia rang pho chhuah a ni thin hian mizo hnam zia rang chawinun kawngah nasa takin awmzia a nei a ni a ti a. Mizoram chu khualzin hiptu (tourist destination) pawimawh tak a ni tih sawiin hnamdang te lo dawnsawn kawngah pawh hma kan sawn zel a, India ram state hrang hrang bakah khawvel ram hrang hrangah Tourism Industry chu pawimawh tak, ram economy ah pawh thawh hlawk tak a ni tih sawiin helam kawngah nasa leh zuala tan kan lak a pawimawh hle a ni a ti bawk.

Dr Lalrozama, IAS, Secretary, Tourism Department in inlawmna thu a sawi a.

Pi Zonunthari, Deputy Secretary, Tourism Department in lawmthu sawina in a khar a ni.

Vawiin Anthurium Festival hi chhawng thuma hman a ni a. Chhawng khatnaah a hawnna programme hman a ni a, chhawng hnihnaah lam leh zai a hun hman niin mizo infiamna chi hrang hrang hrangin entir a ni a. A chhawng thumnaah mipuite pualin lam leh zaia hun hman a ni.