Nizan khan Awithangpa Group YMA Conference, Kawnpui-a neih ah Mizoram Chief Secretary Pu Lalnunmawia Chuaungo chuan India ram Inthlanpui leh MLA Bye Election neih tura lungawilohna lantir tum mek NGO Coordination ten sawrkar ngenna zaha an thil tum an sut avangin lawmawm a tih thu a sawi a. Mizoram chu Pathian hruaina dawng thin State anih avangin hun harsa kan tawh dawn avangin Pathian hruaina a lo thleng thin a ni a ti.

Awithangpa Group YMA Conference Khuallian Mizoram Chief  Secretary chuan India ram State dangah Election dawn hnaia harsatna thleng ang hi Mizoram ah chuan a awm ngai meuh lo a; kumin ah pawh hian mipuite tawiawmna avangin Election muan tak kan beisei a ni a ti. YMA Kumpuan chungchang sawiin Ram leh Hnam humhalh a ngai anih chuan tibuaitu an awm mek tihna a ni a. State pawn atanga min rawn tibuaitu leh State chhunga tichhetu an awm thei a. Ram pawn lam atanga rawn tihbuai hi chu ven a harsa lo; mahse ram chhunga tichhetu hi beih a harsa a; ven ngun ber tur a ni a ti. Mahni mawhphurhna rinawm taka hlen ngai lo te hi tichhetu zingah an tel a; Zirlaiten hlawhtling tura lehkha an zir loh pawhin ram tan a pawi thei a ni. Thawh tur awm apiang hreh lova kan thawh a ngai tawh a; kan thawh peih loh rawn thawktu te hian hun a lo rei deuh in min eichhe thei zel a ti.

Chief Secretary chuan Mizote hian Hnam nun kaihhnawih hla kan ngah a; zai kan ngaina bawk a; heng kan hla te hian Mizo inpumkhatna tha tak a siam a, kan ram leh kan Hnam humhalh nan pawh hmanraw pawimawh tak a ni ang. Chuvang chuan Hla in min phuarkhawm dan hi ngaihtuah zui atan a tha a ti bawk.

Awithangpa Group YMA ah hian Branch 13 an awm a; Thawhlehni atanga Conference vawi 10-na an hman ah hian Lengkham zai leh Hnam lam hmangin Branch te an inel a; Pu R Lalngheta Central YMA Vice President chuan Conference thupui a sawi a. Sub Hqrs YMA bakah Zampuimanga Group YMA leh Pualreng Group YMA ten an hmanpui bawk a. Conference hi nizan khan a thiak a ni.