669/2023-2024

Champhai, the 2nd June, 2023: Champhai District tlawha cham mek, Mizoram Chief Secretary Dr. Renu Sharma IAS chuan vawiin chawhma dar 10:00 khan DC Conference Hall-ah Champhaia Department hotute kawmin Department hnuaia scheme pawimawh hrang hrang hnuaia hmalakna, hmachhawp leh tul dangte a sawipui.

Chief Secretary Dr. Renu Sharma chuan Champhai District chu ramri dep hmun pawimawh tak a nih thu sawiin, nakin lawka ram leh hnam innghahna tur naupang leh thalaite hmakhua ngaiin ruihhlo leh dan lova ramri kaltlanga thil tihte dapchhuah leh man kawngah theihtawp chhuah tlan a tul thu a sawi a. Ramri kaltlanga ruihhlo tawlh chuan Mizoram mai nilo India ram hmun dangte thlenga a nghawng tel avangin Sarkar laipui pawhin a ngaihven hle a ni, a ti a. Ruihhlo do chu Department tih tura dah mai tur a nih loh thu leh khawtlang leh rampum huapa lungrual taka thawhhona tur a nih thu sawiin, Line Department hrang hrangte chu NGO, Kohhran leh khawtlang nena tangruala ruihhlo do leh hemi chungchang inzirtirna tam zawk kalpui turin a chah a. Naupangte'n zirna tha an dawn theih nan leh school kal lo an awm loh nana hmalak a tul thu a sawi a. Fur ruahtui tlak avanga harsatna awm theite leh hemi kawnga inpuahchah lawkna tha tak neih a tul thu a sawi bawk.

Chief Secretary chuan meeting kaltlangin Department hrang hrang hmalaknate inhriatpawhtawn a nih thin thu sawiin, buaipui ngai leh hmalak chhunzawm tulte bawhzui dan tur a hriat theih phah thin a ni, a ti a. Mizoram chu inthlanna felfai leh ralmuang awmna hmun a nih thu sawiin, inthlan kum a nih avangin hemi kaihhnawiha duty turte chu mawhphurhna an neihte dik leh felfai taka hlen theuh tum turin a chah a. Sawkar hotute chu scheme pawimawhte a nihna ang taka kalpui a nih theih nana theihtawp chhuah turin a fuih a. Mipuite rawngbawl tura awm an ni tih inhriaa mipuite'n hma an sawn theih nan leh an khawsak a ziaawm theih nana theihtawp chhuah tur leh, mamawh an rawn thlente inhawng taka lo dawngsawng thin turin a chah nghal bawk.

He hunah hian Champhai District Bawrhsap Pu James Lalrinchhana chuan Champhai District mipuite aiawhin Chief Secretary lawmna thu a sawi a; Champhai District chanchin kimchang, Centrally Sponsored Scheme kalpui meka hmasawnnate, hmalakna kal mekte leh hmachhawpte powerpoint presentation hmangin a tarlang a. SP Pu Lalrinpuia Varte hnen atangin security kaihhnawiha Champhai District dinhmun tlangpui ngaihthlak a ni bawk.

He huna tarlan a nih danin Electoral Roll thar berah Champhai District chhunga Assembly Constituency 3 ah voter 56,362 leh Polling Station 84 a awm a. Department hrang hrang Heads of Offices 67 an awm mek a. May ni 31 thleng khan Champhai District-ah Myanmar atanga raltlan 12,209 an awm a, Refugee camp 34 awm mekin, mi 9,488 te profiling zawhfel niin Temporary ID mi 9,488 te pek an ni a, 263 te buaipui mek a ni a, raltlan pualin legal awareness tum 12 neih a ni tawh a, Manipur atanga raltlan 209 an awm mek bawk.

Champhai District-in Indo-Myanmar border kilometre 160 a thui a nei a. Border pillar 3, BP 26, 27 leh 28 te awmin dan lova thil tute tana awlsam taka ramri kan theihna vulnerable crossing point 23 bawr vel a awm a. Champhai District Executive Force (DEF) hnuaiah Sub-division 1, Police Station 3, Beat Post 1, Checkgate 3 leh Beat Areas 15 a awm bakah 2nd Assam Rifles & 42nd Assam Rifles te khaw 7 ah an an awm bawk. Champhai District chhunga khua 48 te Free Movement Regime (FMR) huam chhungah an awm a. Border Crossing Agreement, 2018 angin Border Pass pe chhuak tura ruahmanna awm chu thenawm ram buai leh rokhawlhna dangte avangin a taka kalpui a la ni thei rih lo a ni.

Vawiin chawhnu khan Chief Secretary Dr. Renu Sharma chuan District Hospital Champhai tlawhin hmalak hrang hrangte leh PSA Oxygen Plant-te a tlawh a. Heng bakah hian hnawm paih mai tur atanga leitha siamna, Pu Vanlalthafamkima, Champhai Vengthlang-in a in bula a kalpui chu tlawhin a enfiah a. Hemi hnu hian Amrit Sarovar kaltlanga Phaizau tuikhuah thawmthat leh Champhai Winery, Tlangsamte tlawhin thawktute a kawm a, hmalaknate a enfiah bawk.

Attachment

  • Loading attachment...