668/2023-2024

Aizawl, 2nd June, 2023 : Vawiin nileng khan DHME Conference Hall, MINECO-ah Health & Family Welfare Department hnuaia peng hrang hrang ten kum 2022-2023 chhunga hma an lak dan te thlirletna neih a ni a. He hun hi H&FW Minister Dr R. Lalthangliana’n a hmanpui a ni.

Dr R. Lalthangliana chuan H&FW mi leh sa kalkhawm te chu an hnathawhna kawngah theihtawp an chhuah thin avangin lawmthu a hrilh a, chutih rual erawh chuan hmasaqwnna tur kawng tam tak a la awm a, induhkhawp lohna pawh kan nei ang, kan thlen chin atang hian hma kan sawn zel tur a ni tiin a fuih a. COVID hripui dona kawngah H&FW hnuaia thawkten theihtawp chhuaha an tih tur an tih theuh avanga lawmthu sawiin Department dangte nen kan thawhhona a tha bawk a, kan zavaia kan tanrualna avangin India ramah a tuar nep ber pawl kan nih phah a ni, a ti.

Minister chuan H&FW Department a enkawl tan tirh atang khan a tihchangtlun nan theihtawp chhuahin ruahmanna te pawh kan han siam a, vanduaithlak takin COVID hripui leng vangin kan duh angin hma kan la chak thei ta lova, a bik takin thawktu indaihlohna phuhruk kawngah kan tum ang aiin hma kan la chak thei lo hi a pawi takzet a, chutih rual erawh chuan daktawr engmawzat kan lak belh a, nurse pawh thahnem tak kan la in Health & Wellness Officer te pawh kan la nual a, heng bak pawh hi a theih ang angin staff dangte pawh kan la a, kan mamawh phuhru zo lo mahse theihtawp kan chhuah reng a ni a ti a. A pawimawh ber chu mi nunna chhan tur leh damlo mangang natna tuarte leh an chhungte tana thlamuanpui tham kan nih hi a ni a, hemi atan hian nitin mahni intiam tharin rilru kan siam thar zel a ngai a ni a ti a. Karleh lawkah khian NITI Aayog a Health changtu Dr VK Paul leh sawrkar laipuia H&FW official pawimawh ten Mizoram rawn tlawh a H&FW official te nen inkawm an duh dawn thu a sawi bawk a ni.

Health & Family Welfare hnathawh thlirletna hunah hian District tin atang CMO leh Medical Superintendent ten an hmalakna chi hrang hrang bakah an hlawhtlinna te, tan lak la ngaihna lait e leh an mamawh chi hrang hrang te an sawi a. Chutiang bawkin National Health Mission, Zoram Medical College, AYUSH, MSACS, Mizoram State Cancer Institute, Nursing leh H&FW hnuaia peng hrang hrang ten report an pe bawk a ni.