Vawiin chawhma khan Chief Secretary Pu Lalnunmawia Chuaungo chuan Information & Public Relations Department, Art & Culture Department leh Mizoram Photographers' Society (MPS) te buatsaih Chapchar Kut 2019, Photo Exhibition, Vanapa Hall-ah a hawng.

Chief Secretary Pu Lalnunmawia Chuaungo chuan Chapchar Kut puala Photo Exhibition buatsaihtute I&PR Director, Art & Culture Department Director leh MPS Member te hnenah lawmthu a sawi a. Mizo nun leh Mizoram tlang mawi tak tak te, pholang thei thla la thiam, Mizo zingah an awm chu lawmawm, a ti a. Mizoram pawnah leh hnamdangte zingah pawh thlalakte hi pholan tham a ni, a ti a.

I&PR Director Pu David L.Thangliana pawhin thu sawiin, MPS Member te chu sawrkar indaihlohna a pianga puitu, society tangkai tak a ni, a ti a. 

MPS President Pu Armand Malsawmdawngzela chuan Photo Exhibition Hawnnaa lokal te hnenah lawmthu sawiin, hun a khar a ni.

Ni li awh tur Chapchar Kut, 2019 Photo Exhibition-ah hian mi 56 ten thlalak 140 an phochhuak a, thlalak size hi 12x8 inches niin, a duh a piang tan tlawh theih leh thlalakte hi lei theih a ni.