Vawiin chawhma dar 10 khan Chief Secretary Pu Lalmalsawma, IAS chuan Central Water Commission (CWC) leh PHE Department tangkawp buatsaih, Jal Kranti Abhiyan (2015-16) chungchang Workshop chu Aijal Club Reception Hall-ah a hawng a. He Workshop hi nikhat awh tura duan niin mithiam hrang hrangten Jal Kranti Abhiyan (2015-16) leh a kaihhnawih thil chi hrang hrangah zirtirna a pe a ni.

Workshop hawngtu, Chief Secretary Pu Lalmalsawma chuan khawvel sik leh sa danglam zelin khawvel hmun hrang hranga tuihna a tih tlem sawt zia tarlangin tunlai thiamna hmanga tuihna humhalh a tul takzet tih a sawi a. Mihring pung zel leh hmasawnna kawnga intlansiakna nasa tak avanga tui lama harsatna tawh a nih lohna tura sawrkar laipuiin Jal Kranti Abhiyan (2015-16) a kalpui chu lawmawm a tih thu sawiin Chief Secretary chuan Jal Kranti Abhiyan thiltum piahlam thlenga ngaihtuahna seng turin kalkhawmte a sawm bawk. Pu Lalmalsawma chuan Jal Kranti Abhiyan hlawhtlin theih nan mipuite rawn chunga hmalak dan tur ruahmana mumal tak pakhat neih a tul thu te, fel taka thil chhinchhiah leh hmalakna reng reng langtlang taka kalpui chunga leh mipuite zirtir uar a tul thute asawi bawk.

Workshop hawnna inkhawm tawi hi PHE Department Secretary Dr. C. Vanlalramsanga chuan a kaihruai a. CWC-a EE Pu M. Sai Sudarsanam chuan CWC hmalakna hrang hrang leh Jal Kranti Abhiyan atana inbuatsaihnate a sawi lang a. Workshop hi hun thumah then a hi a. Hun khatna chu PHE Department E-in-C Pu Valbuanga chuan lawmthu sawiin a khar a. Hun hnihna leh hun thumnaah chuan Mizoram University, Geography & Resource Management Department-a Assistant Professor Pu K.C. Lalmalsawmzuala, Minor Irrigation Department-a EE Pu K. Hamlet, Agriculture Directorate-a SO-cum-SA Pu Lalhmingmuana, PCCF Office-a Working Plan Officer Pu Tshewang Gyaltson, IFS, PHE Department Under Secretary Pu Netralal Jaisi leh Horticulture Department aiawhten zirtirna an pe a, Workshop chhimtute nen sawihona neiin hun khar a ni.

Jal Kranti Abiyan hi sawrkar laipui hmalakna kal mek engemawzat chhunfina siam a nih avangin Workshop-ah hian a kaihhnawih Department hrang hrang hotute leh CWC hotute bakah AMFU hruaitute leh Mizoram University-a Geography & Resource Management Departmen-a Research Scholar engemawzat an tel bawk.

Jal Kranti Abiyan hmalakna atan hian Mizoramah pawh State Level Committee leh District Level Committee-te din fel ni tawhin hmalakna hrang hrang kalpui a ni a. Champhai District huam chhunga khaw pahnih, Mimbung leh Khuangthing khuate chu Jal Gram Yojana hmalakna bul tanna atana thlan niin CWC chuan sawrkar laipuiah DPR an thehlut dawn a ni.