Ministry of Drinking Water & Sanitation bul tumin Mamit District chhung thingtlang khua a cheng khaw 40 a Village Council, MHIP leh Water Sanitation Committee atangin vawiin khan Chhimveng YMA HAll Mamit ah Tuihna humhalh leh tuihnar venhim leh vawn that tih thupuia hmangin training neih a ni a, Pi Lalbiaksangi District Bawrhsap Mamit chuan khuallian niin he hun hi a hawng.

Training hawnna thu sawiin Pi Lalbiaksangi chuan kan tu leh fate tana chenna tlak ram siam tur chuan kan tuihna vawn that leh tih thianghlim hi thil pawimawh tak a ni a, helama inzirtirna hi nasa taka kan kalpui a ngai takzet a ni a ti, kumtin lo kan vata kan ramngaw tam tak te kan ti kang chhe thin hei hian kan tuihnar tha tak tak te a ti kang zova heti reng a kan kal chuan hun lo la awm leh zel turah chuan tui thianghlim hman tur nei lo in kan la awm dawn a ni tih hria a, kan tuihnar te uluk leh duat taka vawng tha turin kalkhawm te a chah a, Hrisel nana pawimawh ber chu tui thianghlim hi a ni a, tui hi kan nunna a tana thil hlu tak ani tih hre thar theuh turin kalkhawmte a fuih a ni.

Pu Lalropuia Hmar EE.PHED Mamit pawhin ‘Vantlang Tui lak chungchanga khawtlang mawhphurhna’ tih hmangin thusawina a nei a, kum 50 lo la awm tur thlir a, kan khua theuha kan tuilakna emaw kan tui khur a tuihna te thianghlim taka vawn a tulzia a sawi bawk.

Pu P.C Zohmingliana, Bacteriologist leh Pu R. Lalnghakliana, Sr Chemist te pawhin ‘Tui sample lak chungchanga leh a pawimawhna’ leh ‘Tui quality endik leh vil zui’ tih hmangin thusawina an nei bawk a ni.

Mamit District chhung thingtlang hmun hrang hranga kan tui tlan mek te a thianghlim leh thianghlim loh entir tur kalkhawmte hian an rawn ken chu endik tura ruahman a ni bawk.

Vawiin trainingah hian Mamit District chhung atangin mi 150 an tel a. Training hi Pu R. Lalnghakliana, Sr Chemist in a kaihruai a ni.