Admiral Sunil Lanba PVSM, AVSM, ADC, Chiefs of Staff Committee Chairman leh Chief of Naval Staff ni bawk chuan nimin khan Aizawl a rawn tlawh a. Raj Bhavan-ah Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chuan ama pualin cultural evening leh banquet dinner a lo buatsaih a ni.

Admiral Sunil Lanba hian Spear Corps Zone-a state pathum – Manipur, Mizoram leh Tripura te chu May ni 13-16 chhung hian a tlawh kual dawn a. Chiefs of Staff Committee Chairman a nihna angin hmarchhak biala security dinhmun a enfiah dawn a ni.

Inspector General Assam Rifles (South) Headquarters, Manipur-ah leh Inspector General Assam Rifles (East) Headquarters, Silchar-ah te security dinhmun hriattir a ni ang a. Heng bakah hian ram venhim hna thawk hotu hrang hrangte nen inkawmna an nei bawk dawn a ni.