Vawiin hian Pi Vanlalawmpuii Chawngthu, Minister of State for Fisheries, Sericulture, etc, chuan Serchhip khaw chhehvela Sericulture leh Fisheries Department hmalakna hrang hrangte a tlawh kual a. Pu. Thlamuana, Secretary, Fisheries chuan a tawiawm.

Minister hian a hmasa berin New Serchhipa Community Fish pond thar tlawhin he dilah hian Sangha chi engemawzat a chhuah a. He dil hi National Fisheries Development Board sum hmanga mi harsa zawk chhungkaw engemawzat intawm tura Department in a siam sak ani. Tin New Serchhipa Fishermen Welfare sum hmanga chenna in sak thar pawh a tlawh bawk.

He mi hnu hian Pu Saphranga leh Pu Siampuia te pangang vulhna hmun, Integrated Sericulture Development Project sum hmanga tanpuina pek te huan a tlawh leh a. Tin a hnuah Pu KC Lalngaihzuala pangang vulhna hmun a tlawh zui leh a ni.

Minister hian Pu Lalhmunsanga Sangha dil leh a dil hmuna Sangha note tharchhuahna hmun tur buatsaih mek Article 275(1) hnuaia sak mek a tlawh leh a. Chumi hnuah Pu Ramliana sangha dil leh Pu Hmangaihthanga te Sangha dil hmun a tlawh leh bawk a. Tin, Mat lui kama Pu Hmangaihthanga rama Community Fish Pond,  chhungkaw pasarih te intawm tura National Fisheries Development Board sum hmanga dil lian tak laih thar chu a tlawh bawk ani. Heng Fisheries Department ten hma an lakna an neih hrang hrang hi NFBD te, RKVY te, Blue Revolution Programme te leh Article 275 (1) atang tea hnathawh hrang hrang te an ni hlawm a, Mat phaia Sangha dil nei lian zual te hian kum khatah Sangha 80 qtls te an tharchhuak thei tawh ani.

Pi Vanlalawmpuii Chawngthu chuan, kut hnathawktu taima, rim taka hnathawk thin tam tak hmuh tur an awm thin chu lawmawm a tih thu sawiin, hlawhtling zel turin duhsakna a hlan a. Mi taima, tanpui tlak te chu Department pawhin a umzui zel tur thu sawiin kum tela Sangha leh Silk thar chhuah pung thei se a duh tak zet tih a sawi a. Sangha note tharchhuah chu Mizoramin a mamawhna a san avangin hlawhtling ngei tura lo bei turin Department hotute leh a dil neitute chu a ngen a ni.

Tin, Pu Lalthlamuana, Secretary pawhin kuthnathawktute chu hlawhtling ngei tura bei tura ngenin, mi taima, tanpuina leh therhlo um ringawt nilo. Theihtawp chhuah tak tak te chu dawmkanna kawng zawn zel a inhuam thu a sawi a ni.

Vawiin a Pi Vanlalawmpuii'n Serchhip leh a chhehvela Sangha dil neitute leh Pangang khawotute a tlawh kualnaah hian Pi Zonuntluangi Chawngthu, DFDO Serchhip, Pu V Zothansanga, DSO Serchhip te leh Addl. DC Pu Chuauhnuna, SP Pu Lalringdika, IPRO Pu K. Saitluanga leh official dang engemawzatin an tawiawm ani.