Vawiin hian Serchhip District Legal Services Authority leh District Child Protection Unit tangkawp te chuan Children Week, 2019 hman mek khar nan Serchhip Sport Complex ah naupangte tan Carnival an buatsaiha. Bialtu MLA Pu Lalduhoma chuan khuallian niin a hman pui a, Carnival hi a hawng. 

Carnival hawnna inkhawm tawi, Pi Lalsiampuii Tochhawng, DCPO kaihhruaia neihah Pu Lalduhoma chuan, naupangte hi pangpang kuhmum ang an ni a, a sena rawn par chhuak tur te a vara lo par tir talh kan tum emaw a vara rawn par chhuak tur a sena lo par tir tum talh kha kawng dik a ni lova. An pianpui talent mila mawi taka par tir kha puitlinng tawh te zawng zawng mawhphurhna a ni, a ti. Nu leh pa ten nih tir tum sa kan lo nei ngawt tur a ni lova, an chemkalna kan zawng anga, kan haichhuak anga, tah chuan kan hruai zawk tur a ni, tiin naupangte chu uluk tak leh fimkhur taka enkawl an tul thu a sawi a ni. Pu Lalduhoma chuan, pa ber si, faten Sakei hlauh taka an hlauh, khur chunga an leng haw an nghah thin kan la awm, chutiang ang naupang vanduaite venhim leh chhanchhuah chu sawrkar, kohhran leh NGOs ten kan batah i ngai ang u, tiin a sawm a. Naupang kalkhawm te chu nunkawng pangai leh tluang tak zawh zel tum turin a fuih  a ni.

Pu Lalduhoma hian Children Week puala intihsiakna hrang hranga lawmman adwngtute hnenah lawmman a hlan nghal a ni.

He hunah hian Pu Laldinpuia, Adalat Member chuan kal khawmte lawmna thu a sawi a, Serchhip a Children Home hrang hrang atanga thlan khawm (Combine Choir) ten a hawnna hla an sa bawk a ni. 

A hawnna inkhawm tawi neih zawh hian naupangte intihhlimna hmanraw chi hrang hrang an chhawpah naupang za tam tak ten infiamna hun hlimawm tak an hmang zui a ni.