3017/2022-2023
Lunglei the 12th December, 2022 – Kan hma lawka lo thleng tur Christmas leh Kumthar vuakveta Lunglei District huamchhunga dan leh thupek kenkawh leh venhimna kalpui dan tur chungchang ngaihtuahin vawiin khan Lunglei Additional DC Pu Donny Lalruatsanga kaihhruaiin DC Conference Hall-ah meeting neih a ni.

Meeting-ah hian Police, Excise, Transport leh I&PR thawktute leh tlawmngai pawl aiawhte an tel a ni.

Meeting kaihruaitu Pu Donny Lalruatsanga chuan Christmas leh Kumthar vuakvetah boruak muanawm leh hlimawm tak kan neih theihnan mawhphurna neitute kan tanruala, thawhhona tha tak hnuaia hma kan lak tlan a tul a ni, a ti a. Hemi kawnga hmalakna ah hian khawtlang hruaitute, tlawmngai pawl aiawhte leh Lunglei District mipuite thawhho puiah sawmin mahni zawn theuha hma la tur leh Dan leh thupek te zawm theuh turin mipuite a chah a ni.

Lunglei Police, Excise & Narcotics Department leh Sub Hqrs YMA hruaitute hnen atangin hemi kawnga ruahmanna hrang hrang an siam te leh hmalakna kal mekte ngaihthlak a ni a.

Lunglei Additional SP Pu C. Lalfakmawia chuan Lunglei Police te inpuahchahna leh hmalaknate report a pe a. Lunglei Police ten tun dinhmunah patrolling ngawrh taka kalpuiin ni khatah vawi 4 – chhunah vawi 2 leh zan lamah vawi 2 patrolling an kalpui a. Hunpui chhungin mipuiten awlsam zawka police an pan theihnan leh venhimna chak zawka kalpui anih theihnan Lunglei khawpui chhung hmun lun lai pathum – Chanmari, Police Station kawt Venglai leh Sobji Bazar ah te a duh apiang pan theih turin vawiin atangin Police Help Desk chhawpchhuah a ni a. Halpuah, halmawi, sky lantern leh silai lem khapna thupek kengkawh turin Flying Squad din niin ngawrh takin duty kapui mek tawh a ni a. Hunpui laia emergency alo thlen thulha che chhuak thuai thei turin Quick Response Team (QRT) din niin VDP, YMA leh VC-te nen tanghova ngawrh taka duty kalpui zel tum a ni a. Lirthei chetsualna a thlen lohna tur leh hunpui chhunga mipuite an fimkhur zawk theihnan Traffic Special Drive pawh kalpui mek zel a ni.

Excise & Narcotics Department atang pawhin report ngaihthlak a ni a. MLP Act 2019 leh ND&PS Act, 1985 te tha taka kenkawh anih theihnan December ni 15 atanga January ni 5, 2023 thleng Lunglei District chhunga duty tur ruat fel an ni a. District chu group panga ah then niin mi 26 duty tura ruat an ni.

Sub Hqrs YMA President Pu Lalrotluanga pawhin YMA hmalakna report a pe a. Sub Hqrs YMA hruaitute hian December ni 8, 2022 khan Town Branch YMA hruaitute ko khawmin Hunpui puala hmalak dan tur Resolution an pass a. Zu leh ruihhlo do kawngah te, rukruk leh pawikhawihna bakah lirthei chetsualna laka him tlan theih dan tur te, sawrkar phalloh Halpuah, halmawi, sky lantern leh silai lem khap hlawhtlin anih theihnan te leh Branch hrang hrangte inpawh tlang taka hmalak ho dan turte rel fel a ni a. Branch tin te hian Duty Booth siamin duty an kalpui dawn a ni.

Hunpui laiin lirthei chetsualna a tam thin avangin Traffic Special Drive kalpui bakah leh DTO hmalaknain Vehicle Checking uluk taka kalpui ni se tih rel a ni a. Lirthei khalhtute a bik takin khualzin phur lirthei khalhtute fimkhur tura ngenna tih chhuah ni se an ti a. Rui chunga motor khalh man te chu Dan anga na taka hrem ngei ni se tih meeting chuan a rel a. Zu rui leh dan bawhchhia man te pawh Dan in a phut an ngeia an chunga action lak vek ni se tih meeting chuan a rel a. December ni 24 leh December ni 31 ah te joint patrolling nei tura ruahmanna siam nghal a ni bawk.