2471/2025-2026

New Delhi, the 17th of September, 2025: Vawiin khan Confederation of Indian Industries (CII) buatsaihin New Delhi-a Lalit Hotel-ah ‘North East CSR Connect 2025’ hun hman a ni a, Pu Lalnghinglova Hmar, Minister of State, Sports & Youth Services, Tourism, Excise & Narcotics leh LESDE Department chuan he hun hi khualzahawm niin a hmanpui.

Minister Pu Lalnghinglova Hmar chuan CSR Connect hawnna hunah thu sawiin, “Mizoram chu state lian lo leh mihring tlemna, CSR pawh dawng tam lo tak state a ni. Chutihlaiin Mizoram hi CSR fund hmanna tur tak state kan ni a, mipui kan tlem avangin investment pawh a langsar hma a, awmzia a nei bik thin,” a ti a, kalkhawmte chu CSR hmanga hmasawnna ngelnghet thlen tura Mizoram leh Northeast lam hawi turin a sawm.

Pu Tetea Hmar chuan Mizoram in CSR Cell felfai tak a neih thu leh, Chief Minister office atanga vil a nih thu a sawi a; Mizorama CSR invest duhte’n awlsam, langtlang leh awmze nei zawka an kalpui theihna’n ‘Mizoram CSR Connect’ chu hman theih tura peihfel tep a ni tawh tih a tarlang bawk.

Mizoram leh Northeast India-a CII hmalakna hrang hrangte tarlangin, Mizoramah ngei CSR Conclave buatsaih turin CII hotute a sawm nghal a ni.

Sports Minister ni bawk Pu Lalnghinglova Hmar chuan Mizoramin sports leh skill development kaihkawp turin ruahmanna thui tak a siam tawh tih a sawi a, chumi hawi zawnga CSR fund-te hmang turin corporate-te chu a ngen.

North East CSR Connect-ah hian DoNER Minister Pu Jyotiraditya Scindia chuan video message kaltlangin thu a sawi a, CII buatsaih ‘CSR Investment in Northeast India: Understanding Barriers and Way Forward’ tih chu tlangzarh nghal a ni bawk.

Inaugural session zawhah hian Mithiam thlan bikte’n topic pawimawh tak tak “Corporate Best Practices: Driving Scalable CSR in the Northeast” leh “NGO Capacity Building: Compliance, Accessing CSR Funding & Strengthening Partnerships” te an sawiho a. Northeast state hrang hrang aiawhte’n an state theuha CSR invest na tur priority area an neihte presentation hmanga tarlangin, Mizoram aiawhin Pu Henry C. Lalrawnkima, Secretary, Mizoram State Sports Council chuan a present a ni.

Confederation of Indian Industries-ah hian direct member hi company 9,700 vel awmin, indirect member 365,000 vel an awm mek a. CSR Connect hi Northeast-a CSR tam zawk invest a nih theihna’n buatsaih niin, kumin hi a vawihnihna a ni a. Nikum July 3-4 khan New Delhi-ah tho a vawikhatna’n neih a lo ni tawh a ni.

Kumina CSR Connect-ah hian Mizoram atangin Pu Malsawmzuala Ralte, Chairman, Mizoram Youth Commission, Pu John Tanpuia, Director, LESDE Department bakah CSR Cell Mizoram leh MYC atangin official an tel a. Mizorama NGO - Mission Foundation Movement, Goodwill Foundation leh Zo Inspiration aiawhte an tel bawk a ni.