2332/2024-2025

Aizawl, 1st October, 2024: Ministry of Agriculture & Farmers Welfare hnuaia Central Integrated Pest Management Centre (CIPMC), Aizawl chuan nimin leh vawiin khan 'HRD Program on IPM for Kharif 2024-2025' tih thupui hmangin Dampui, Zawlnuam RD Block, Mamit District-ah training hlawkthlak tak an buatsaih.

Ni khatnaah hian CIPMC Aizawl-a officer in-charge leh Technical staff-te chuan IPM peng  hrang hrang, thlai bawm rannung, natna leh thlai tana rannung tangkai thliar hran dante, awmze nei leh him zawka rannung thahna hlo hman dante, rannung thahna hlo chemical pesticide-in nghawng thalo a thlen theih dante bakah AESA chungchang leh adangte an zirtir a ni.

HRD programme ni hnihnaah hian thlai chi sawngbawl dante, rannung thahna hlo him biopesticide leh botanical pawimawhnate, sazu lam chi reng reng khuahkhirh dante, qualitative surveillance neihna tura NPSS hman tangkai dante loneitute zirtir an ni a. Hemi atana siam Apps hmanga rannung thliar hran dante ataka entir an ni bawk a; loneitute an tel thain an hlawkpui hle a ni.