3503/2022-2023
Aizawl, 7th February, 2023 : Nimin (6.2.2023) chawhnu khan Human Resources Development (HRD) Board Vice Chairman Dr L.Thangmawia, MLA chuan MBSE Class IX Textbook thar, Science leh Mathematics zirlaibu mizo tawng leh sap tawnga dah kawp chu MBSE Conference Hall, Chaltlangah a tlangzarh.

Tlangzarhna inkhawmah thusawiin Dr L. Thangmawia chuan zirlaite tana Class IX Science leh Mathematics zirlaibu mizo tawnga chhawpchhuah a lo ni ta chu Zoram mai ni lo, India ram ang pawha zirna lama mel lung pawimawh tak a ni a ti a, he zirlaibu thar tihchhuah a nih theihnana ngaihtuahna sengtu School Education Minister Pu Lalchhandama Ralte leh a hlawhtlin theih nana chak taka bawhzuitu Mizoram Board of School Education(MBSE) te, zirlaibu mizo tawnga lehlin hna hautak tak thawktu zirtirtu leh mithiam te chungah lawmthu Zoram mipui aiawhin a sawi a ni.

Dr Thangmawia chuan Science leh Mathematics tawngkam te hi mizo tawnga a tlukpui kan neih loh a tam bik avangin lehlin hnathawh hi hna hautak tak mai a ni a, sawrkarin Mizo Language Development Board (MLDB) a din hi hnathawk theia a awm hunah chuan heng technical term tam takte hi mizo tawnga seng lutin kan tawng ti hausatu a la nih ngei ka ring a, zirlaiten Science leh Mathematics zirlaibu te mahni tawng ngeia chhiar tur an neih hnu hi chuan subject hara an ngaihna thin pawh a tih ziaawm ngei ka beisei a ni, a ti.

Dr Thangmawia chuan lehkhathiam tura sap tawng thiam a pawimawh avangin sap tawng thiam turin kan bei nasa a, hei hi thil tul tak ni mahse mahni hnam tawng hnualsuat leh thiam loh phah nana kan hman chuan kan hnam kal zel turah thil pawi tak a thlen thei a, chuvangin kan hnam tawng thiam tak chunga sap tawng thiam tura tanlak dan kan zawn a ngai a ni, a ti a. Tun ang zela kan kal chuan sap tawng thiam tak tak si lo, mizo tawng thiam chuang si lo thahnem tak thangthar zingah kan awm a hlauhawm a ni a ti.

Lehkhabu tlangzarh inkhawmah hian Science Teacher Association of Mizoram(STAM), Mizoram Mathematics Society(MSS), Mizo Students’ Union(MSU) aiawhte, lehkhabu letlingtute leh sawmbikte an tel a. Inkhawm hi Pu J.H.Zoremthanga, Chairman, MBSE in kaihruaiin India ram Education Board zingah bilingual textbook nei hmasa ber an nih thu a sawi a. Pu R.Lalthlamuana, Director(Academics), MBSE in report pein, Pu Lalrinmawia Ralte, Controller of Examinations, MBSE in lawmthu sawiin hun a khar a ni.