3502/2022-2023

Aizawl, the 06th February 2023: Vawiin chawhnu khan Governor Hari Babu Kambhampati chuan Project Pushpak hnuaia ramri hrul kawngpui enkawlna leh kawngpui thar siam hna thawktu Border Roads Organisation(BRO) hotute chu Raj Bhavan-ah a kawm a. He hunah hian Pu SP Kolipey, Chief Engineer, Project Pushpak chuan PowerPoint hmangin Mizorama kawngpui thar 8 siam mek leh kawngpui 6 awm mek enkawl hna thawhdan a sawi fiah a. CE hi Col. Abhishek Goel, Director(works), Pu Virender Singh, Commander, 24 BRTF leh Pu Chalhmingthanga, Jt.Director ten an tawiawm a ni.

Governor Hari Babu Kambhampati chuan Mizoram hmun kilkhawr zawkah te inkalpawhna tha zawk a awm theih nan Project Pushpak hnuaiah BRO ten hna ropui tak an thawk tih a sawi a. Heng kawngpui te hi a chhawr tangkaitu chu mipui an nih rualin ram venhimna kawnga thawktu sipai te tan pawh a tangkai dawn hle a ni a ti. Mizoramah hnathawh hun chhung a rei lo tih hre chunga chak taka hna an thawh thin avangin BRO te chu an fakawm thu a sawi bawk.

BRO chuan an project khawihah te pawnlam atanga harsatna te an tawk chungin hna an thawk chak thawkhat nia a hriat thu a sawi a. Tun aia tan an lak leh zual chuan BRO chu kawngsiamtu agency thenkhat leh contractor te entawn tur khawp a theihna neiah a ngai tih a sawi.

BRO te a kawmnaah hian Governor chuan Mizoramah hnathawh hunchhung a reilo tih chu tlang hriat a ni a. He hnathawh hunchhung rei lo leh harsatna awm thei zawng zawng te hi project siam dawnah sawifiah, a bilh tel vek a ni a. Heng zawng zawng chhut lawk sa vek hian Project thawh zawh hun tur hi siam a ni thin a ti. Governor chuan Mizoramah chuan project te kum 2 atanga kum 3 thawh zawh tura siam te chu kum 5, kum 6 leh a aia reiah te zawh a ni fo thin a. Hei hian project thar awm tur a lo dan bakah mipui ten an chhawr tangkai hun tur aia tlaiah an chhawr phah fo a. Thil fello tak a ni a, hmasawnna ruhrel dintute hian mawhphurhna pawimawh tak an nei hi an hriat chiana, an hnathawh tur te pawh a hun takah thawh zawh dan kawng an hmuhchhuah a ngai a ni a ti.

Governor chuan BRO te chu kawngpui siam hna an thawh kawngah tunlai thiamna thar te hman tangkai tum turin a chah a. Sarang leh plastic bawlhlawh te pawh tangkai taka kawngsiamna hmanrua a hman dan dap ve turin a fuih a. BRO hnathawh leh project te pawh Mizoram mipuiin an hriat theih nan BRO hotute chu tlangzarh kawngah tan la turin a fuih a. Mizoram mipuiin Project Pushpak in Mizoram tana hna tha tak tak a thawh te hi an hriat chuan tun aiin an thlawp tha leh zual ang a ti.

Governor chuan Mizoram chhim lama kawngpui pawimawh tak pakhat Hnathial leh Sangau inkara darzo Lei chu Lirthei rit zawk kal theih a siam a pawimawh tih a sawi a. Hemi chungchanga a zawhna chu BRO lam chuan chhangin he Lei dawhna tura DPR chu pawm a ni tawh a, Tender pawh chhuah a ni tawh tih an sawi a. Darzo lei siam hna hi tan thuai an in beisei tih sawiin a siam zawh nan kum 2 atanga kum 3 a ngai niin an sawi bawk.

BRO in report an pek dan chuan tunah hian kawngpui thar KM 588.08 siam hna an thawk mek a; kawngpui awm sa KM 307.70 enkawl hna pawh tun atanga reiloteah an thawk thei dawn a ni. Lei dawh hna hmun 22 ah an neih zingah 17 chu an la thawk mek a, 2 chu an la thawk tan lo a, 3 an thawk zo tawh a ni.

Mizoramah kawngpui siam hnaah an harsatna tawh ber chu hmanraw tha hmuh tur avang thin a, kawngpui te a tlo lo thin tih an sawi a. He harsatna sukiang tur hian hmanrawn thenkhat tunlai thiamna hmangin an hmang mek tih an sawi. BRO ten report an pek dan chuan  Cementitious Base (CTB)  & Cementitious Sub Base (CTSB) te, Geo Textile, Biological Enzymes and Biaxial Geogrid bakah plastic chhia te kawngpui chunglang leh a chhunglam tih tlo nan an hmang tan a ni.