3501/2022-2023
Aizawl, 6th February, 2023 : Tun hnaia College zirtirtu thenkhat dah ngheh leh sawn chungchangah Pu R. Lalramnghaka, Secretary, Higher & Technical Education department chuan vawiin khan a hnuaia tarlan ang hian thuchhuah a siam
1. Government of Mizoram, Higher & Technical Education Department chuan a Department hnuaia Sawrkar College hrang hranga thawk Assistant Professor (Contract) 64 (sawmruk leh pali) te dah nghehna (regularization) Order chu Notification No. A.41017/1/2023-HTE(Reg.) dated 27th January 2023 hmangin a chhuah a. Tin, Aizawl pawn lama College zirtirtu 14 (sawm leh pali) te Aizawl leh hmun danga sawnna Order pawh Notification No. A.22018/2/2020-HTE, dated 27th January, 2023 hmangin a chhuah nghal bawk a.
2. He'ng Order tar lan tâkte-a lang ang hian Assistant Professor dah ngheh tharte chu an thawh mêkna hmun aṭangin post ruak awmna College hrang hrangah dahin, khawpui pâwna College zirtirtu zinga a nghetsa, hun rei tak tak lo thawk tawh, Aizawl / mahni khawhmun ngheta awm mamawh tak takte pawh chutiang tur chuan College hrang hrangah sawn an ni a. Assistant Professor dah ngheh thar zinga Psychology leh Electronics zirtirtute erawh chu Aizawl pâwna College-teah an thawhna tur Department a awm ve loh avangin dah chhuah an ni ve lo.
3. Sorkar chuan hetianga a ngheta dah hlimte leh a nghetsa te awmna inthlak kual hi College zirtirtute service condition khai rualna’n pawimawh a tih bâkah, College tina subject hrang hrang zirtirtute an zirlai neih tam dan azira a theih ang anga insâwi rem (rationalisation) a tum mêk atâna rahbi hmasa atâna ti a ni bawk a.
4. Tuna College zirtirtu transfer chungchangah hian College ṭhenkhatah sawn chhuah leh sawn luh inzât chiah lo a awm tih Sorkar chuan a hria a. He mi siam fel tur hian hma a la chhunzawm mêk bawk a ni.
Kalphung mumal leh ṭha zâwk duh avanga Sorkar hma lak mêkna hi Higher & Technical Education Department chuan, a hnuaia Sorkar College-te leh Zoram mipuite’n hrethiam a, Sorkar hmalâkna ngaichâng thiam tûrin a ngen tak meuh a ni e.
