3500/2022-2023

Lunglei the 6th February' 2023: Vawiin chawhnu dar 1:00 khan Lunglei Gov't College Multipurpose Hall ah Agriculture Technology Mananagement Agency ( ATMA), State Agricultural  Management & Extension Training Institute ( SAMETI ) leh National Institute of Agricultural Extension Management ( MANAGE ) te buatsaihin February ni 11.2023 chhung awh tur   Training Programme on Mushroom Production Techniques chu Pu H. Rothanga, Lunglei Govt College,  Principal chuan a hawng.

Training hawnna inkhawm hi Dr.V.Zodinsanga, Project Director, ATMA Lunglei in kaihruaiin  khuallian  Pu L.H. Rothanga, Principal Lunglei Gov't College chuan training hawnna neiin ATMA ten zirlaite tana ṭangkai leh an hmalam hun atana an chhawr ṭangkai theih tur Programme an buatsaih chu lawmawm a tih thu a sawi a. College lam aṭang pawhin zirlaite hmakhua ngaia eizawnna kawng mumal zawk an zawh theihna tura theihtawpa hma an lo lak ṭhin thu a sawi bawk. National Education Policy 2022 pawhin sikul session tharah chuan kalpui theih an beisei thu Pu L.H. Rothanga chuan sawiin he Policy ah hian Skill Developement lam pawh nasa zawka kalpui tum a nih avangin ATMA te nen pawh thawhho a ngai dawn a ni a ti. Zirna In hian a tum ber chu lehkha zir a nih laiin lehkha zir pah a thiam thil dang zirlaiten an zirchhuah theihna tur kalpui hi zirna in in a ken tel pawimawh tak a ni a, Education Certificate kan neih rualin eng hna pawh thawk thei tura kan inzir chhuah a ngai a ni tiin chutiang kawnga zirlaite tana ṭangkai tak tur ATMA ten Lunglei Gov't College Zirlaite tan an buatsaih chu lawmawm a tih thu sawiin ATMA chu zirlaite mamawh chhanna pakhat a ni a ti. He training a tel zirlaite pawhin rilru tak tak pe a, a taka chhawr ṭangkai thei ngei tura hlawkpui tum turin a chah bawk a ni.

Mushroom Production Techniques Training neih chhung hian Lunglei Gov't College a Botany Subject Zirlaite hnenah Pu John. Laltluangliana DPD leh Pi Lalrothangi, Asst. Technology Manager ten Theory leh Practical in zirtirna an pe ṭhin dawn a ni.