Ram chhung hmun dangte rualin tukin khan Mamit Charkawn-ah Cleanliness Week, 2018 hawnna neih a ni a. Pu Vanlalngaihsaka, Mamit District Bawrhsap chuan khuallian niin Week hi a hawng.

Khuallian Mamit District Bawrhsap chuan faina leh thianghlimna chu Cleanliness Week ringawtah a ni tur a ni lova. Kan damchhungin kan fai reng tur a ni a ti. Keimahni leh kan in leh lo a fai chuan kan khawtlang a fai a ni tiin naupangte chu tun atanga faina kawnga an thanharh chuan nakin lawkah khawpui nuam tak kan ni dawn a. Anmahni-ah faina kan tuh ngheh deuh deuh a tul thu sawiin hlawhtling taka Mamit khawtlanga hman a nih theih nan Cleanliness Week, 2018 chu a hawng.

Mamit-a Faina Hapta hawnna inkhawmah hian Mamit khawpui chhunga khawtlang hruaitute leh tlawmngai pawl hrang hrang, Jt. VC, Sub Hqrs YMA, MHIP Sub Hqrs bakah Sub Hqrs MUP aiawhte'n thu sawiin faina leh thianghlimna kawnga an hmalakna hrang hrang tarlan a ni a. Pawnlam hmuh theih faina piahlama rilru thianghlim leh hrisel neih pawimawhna leh khawtlang mipuite tan lakna tur hrang hrangah infuihtharna neih a ni a. Mamit SP thar Pu Shashank Jaiswal, IPS chu mipuite hmelhriattirna neih niin Mizotawngin lawmthu sawina a nei ve bawk a ni.

Faina Hapta chhung hian Mamit khawpui chhunga veng hrang hrang, Zirna in hrang hrang leh Restaurant etc faia inelna neih tur a ni a. Endiktu tura ruat bikte'n uluk taka endikin lawmman siam a ni leh dawn a ni.

He hun hmanna-ah hian khawpui fai inelna kalmekah lawmman semna tukina Vanapa Hall, Aizawla neihah Mamit khawpui chuan Mizoram khawpuite zingah lawmman pathumna (3) a lak thu puan nghal a ni a. Hei bakah hian Mamita Cleanliness Week, 2018 hawnna huna kal tha ber veng, Mamit Hmarveng hnenah lawmman pek an ni bawk.

Cleanliness Week, 2018 hawnna hi Pu H.D Lalpekmawia, DUDO, Mamit chuan kaihruaiin kalkhawm zawng zawngte hian faina kawnga hmala tura intiamna (Pledge) an nei bawk.