Tukin zing khan Vanapa Hall-ah kumin chhunga Faina Hapta, Urban Development & Poverty Alleviation Department(UD&PA) in a huaihawt chu Planning Minister Pu Lalsawta in a hawnga. He hunah hian NEDP Component pakhat  Climate change, cleanliness and sanitation drive hnuaia hmalakna - Faina kawnga Mizoram  khawpui 23 te  intihsiakna result chu puan nghal a ni a. Category chi hniha pathumna hauh pha chin khawpui 3 ve ve te  leh a pumpui huapa hmala tha zual  khawpui 3 te hnenah lawmman hlan a ni.

Cleanliness Week 2018 hawngtu Planning Minister Pu Lalsawta chuan Faina kawngah mipui an harh tan niin a sawi a. Faina leh hriselna  te thil inzawm tlat, faina leh hmasawnna pawh thil inkungkaih tlat a ni a ti. NEDP hmalakna hnuaia Mizoram khawpui fai Ranking chu ngaihhlut a hlawh chho zel tih a sawi a.  Khaw fai ber te chuan an dinhmun hmun ngai hauh tumin hma la chhunzawm zel se; khaw fai ber zinga lang pha lo te pawhin lanphak tumin tan la leh zual se. Chu chu kan zaa kan thatpui vek tur inelna a ni ang a ti.  Fai leh balh chu rilru lam atanga intan a ni tih a sawi a. Fai leh balh chu banphak ve ve a awm a, duhthlanna a innghat a ni a ti a. Duhthlanna thiang hmangin faina chu mitinin kan thlan zawk a ngai a. " Ti bawlhhlawh lo zawnga hmalak hi Ti fai zawnga hmalak tluk zetin a pawimawh", tiin  bawlhlawh thenfai tlukin bawlhhlawh siam loh a pawimawh thu a sawi a. Planning Minister chuan Faina kawnga hmalaknaah pawh mimal thathona ringawt a tawk lova,  khawtlang, veng leh chhungkua ang te pawha thawhhona tha a pawimawh hle a ni a ti.  

Cleanliness week hi Mizoram in  1977, Swachh Bharat Mission Central sawrkarin a kalpui hma daih tawh khan faina lam inzirtirna atan a lo hmang tawh a ni. Kuminah pawh cleanliness week a hawnna pui Aizawla kan neih  ang hian khawpui lian deuh, Urban Town kan tih  zawng zawngah te  kar tluanin hman a ni dawn a ni.  He hun chhunghian khawpui chhung theuh faina lam inelna te bakah hnatlangte thawkin mahni khua theuhah hma nasa taka lak vek tum a ni.

NEDP hmalakna, Climate change, cleanliness and sanitation drive hnuaiah hian  Mizoram pum khaikhawm tu Mizoram Sanitation Task Force din niin District  tinah District Sanitation Task Force leh Khawpui tinah Town Sanitation Task Force te din vek a ni a.  Heng te dinfel a nih hnu hian khawpui faiber inelna chu July 16, 2018 khan UD & PA  Minister Pu  Zodintluanga  Pisa-ah hawn a ni tawh a. Hemi inelnaah hian khawpui hrang hrangte hi Category 2 ah then a ni a.  Category 1 ah District headquarters te an inela.  Khawpui dang te Category 2 ah an intihsiak thung. Mithiam bik panel of experts din  ni a, anni chuan  September thla chhung khan endikna hun neiin Mizoram khawpui 23 te endikin an fang chhuak vek a ni.  Endikna tehfung  hrang hrang hman a ni a. Chungte chu bawlhhlawh thliar hran te, waste re-use lam te , open defecation free status , citizens participation leh public awareness etc .,te  a ni a.

Mizoram Khawpui Fai Ber -  Intihsiakna 2018 thlan dan te Pu Lalrothanga, SE, PHE chuan a sawifiah hnuin he intihsiakna a tithaber pathumte Planning Minister Pu Lalsawta chuan a puang nghal a ni.  Category - I - District Capital te inelnaah hian point 92 hmuin Lunglei chu khawpui fai bera thlan a ni a, Serchhip in Point 90 hmuin pahnihna a hauh a, pathumna chu point 82 hmutu Mamit a ni. Category - II - Khawpui dangte zingah Point 94 hmutu Biate chu Pakhatna a ni a, point 93 hmutu Zawlnuam chu pahnihna niin Lengpui chuan point 91 hmuiin Pathumna a hauh thung a ni. Tin, a pumpui huapa khawfaiber  -= City/ Town huangah Biate chu khawfai bera puan a ni a, Zawlnuam khawfai ber dawttu leh Lunglei chu khawifai ber pathumna a ni. Category -I leh II a lawmman te chu Pakhatna : Rs 1,00,000/-, pahnihna : Rs 70, 000/- leh pathuma : Rs 50,000 a ni.

Inauguration of Cleanliness Week 2018 & Prize Distribution of Cleanliest Town 2018 hi Pu Vanlalmawia, Joint Secretary, UD & PA in a kaihruaia, Panel of Experts te hnen atanga report ngaihthlak a nih hnuiin Pu RL Zidinga, DD, UD &PA in lawmthu sawiin a ti tawp a ni.