India Hnam Pa Mahatma Gandhi pianchampha phak puala kum tina buatsaih thin October ni 2-9 awh tur Faina Hapta (cleanliness week) 2018 chu Lawngtlai District tan tukin zingkar khan Lawngtlai Bazar Venga Areopagy-ah LADC-a Executive Member i/c LAD Pu H. Chhuanawma'n a hawng. 

Pu H. Chhuanawma chuan Lawngtlai khawpuiin faina kawngah hma an sawn zel thu sawiin, hmabak erawh a la tam a, fai turin mi tih theih ang chu kan ti ve thei tih rilru pua ke pen zel a tul a ni, a ti a. Faina chu hriselna leh changkanna a ni tih sawiin, mipui pung khawmte chu mahni faina an buaipui mai bakah, mi dang kawhhmuhtu leh zirtirtu nih tum theuh turin a chah.

Lawngtlai District UD&PA department huaihawta he hun hman hi Lawngtlai CMO Dr Lalthlamuana'n a kaihruai a. Sawrkar official-te leh tlawmngai pawl hrang hrang bakah, Don Bosco School leh Downtown English School naupangte telin, hawnna hun hman zawh hian hmun thumah inthenin khawlai dunga bawlhhlawh then fai hnatlang neih zui nghal a ni.

Faina Hapta pual hian Lawngtlaia sawrkar office fai, sikul fai leh hotel/thingpui dawr fai thlan a ni leh dawn a. Heta thlan chhuahte hi October ni 9-a Faina Hapta kharnaah lawmman hlan an ni ang.