No.1125/2021-2022
Khawzawl, the 25th June, 2021: Vawiin khan Chief Minister’s Relief Fund atanga sum dawn hmangin Khawzawl District chhunga Total Lockdown-in a nghawng nat zual, chhungkaw 869 hnenah buhfai, tel leh dal sem a ni. He hun hi Pu Zothanmawia, Deputy Commissioner, Khawzawl District chuan kaihruaiin, chhawmdawlna sem tur phurtu motor-te chu DC Office kawt atangin a vailiam a ni.

CM Relief Fund atanga chhungkaw harsate chhawmdawlna tur pawisa dawn hmang hian buhfai quintal 109, dal quintal 36.25 leh tel packet 869 semchhuah phawt a ni a. Hengte hi DC Office-ah phurhkhawm niin, LPK paruk hmangin Khawzawl District chhunga khaw hrang hrangahte semchhuah a ni.

CM Relief Fund atanga chhawmdawlna dawngtute hi Khawzawl District-a Village Level Task Force (VLTF) ten an veng/khaw mipuite dinhmun thlir chunga an thlanchhuah niin, Khawzawl District-a VLTF 38 zinga 11 te chuan an veng/khuaah CM Relief Fund atanga chhawmdawl ngai chhungkua an awm rih loh thu an report a ni. In report zingah Khawzawl town chhunga VLTF 8 atangin chhungkaw 322 leh District chhung khaw dang VLTF 19 atangin chhungkaw 547, an vaiin chhungkaw 869 hnenah tanpuina hi sem a ni a, tanpuina dawngtu zat hi mi 3,622 (sangthum zaruk sawmhnih leh pahnih) an ni bawk.

A mawmawhte tana buhfai, dal leh tel semna hi zingkar atangin DC office-a thawkten Covid-19 SOP zawm chungin an buaipui a, District chhunga veng/khaw hrang hranga VLTF te nen tangrualin an sem a ni. Buhfai hi mi pakhatah kg 3 theuh hisapin sem chhuah a ni a. Dal hi mi pakhatah kg 1 zela sem niin, Tel hi chhungkaw pakhatah packet 1 zela sem a ni bawk.