634/2023-2024

Kolasib dated 31st May 2023: Vawiin chawhnu khan natna hrik hrang hrang avanga naupang kum 5 hnuai lam kawtha lo lak a an him theih nana kum 2014 atanga beihpui thlakna,’ Intensified Diarrhoea Control Fortnight’ chu kum 2023 atan Kolasib district chhunga kalpui dan tur relin thutkhawmna neih a ni a. Dr Lalawmpui Chhangte, Chief Medical Officer chuan hun kaihruaiin Senior Medical Officer, District Medical Superintendent, Public Health Engineering Department, District Education Office, District Program Officer, District Information & Public Relations Officer, Indian Medical Association aiawhte leh Health Department-a thawktute an tel a ni.

Thutkhawmnaah hian ‘Intensified Diarrhoea Control Fortnight’ chu ni 5, June, 2023 chawhma dar 10:30 hian District Medical Superintendent pisa kawtah a hawnna hun hman tur a ruahman a ni a. June ni 19 thleng hemi pual hian Anganwadi, School, Health Sub-Centre, Primary Health Centre leh Community Health Centre-ah te ORS-Zn Corner siam tur a rel a ni. Naupang kum 5 hnuai lam ten kawtha lo an neih loh nana hmalakna ah hian ASHA kaltlangin a mamawhte tan ORS pekchhuah a ni ang a, hriselna atan tui thianghlim in leh kut sil fai pawimawhna zirtirna hun neih a ni dawn bawk a ni. Thingpui dawr leh chaw eina hotel-a ei leh in thianghlim a awm theih nan FDA kaltlangin kumin khan endikna kalpui a nih tawh thu thutkhawmnaah hian tarlan a ni a, thianghlimna kawnga hmasawnna a awm zel theih nan mipui zirtirna kawnga hmalak dan turte sawi a ni bawk.

Kum 2022 khan ‘Intensified Diarrhoea Control Fortnight’ hi ni 23 June atangin ni 7 July thleng khan hman a ni a. ASHA 87 ten khaw 52 tuam chhuakin naupang kum 5 hnuai lam, za zel a 93-te hnen ah ORS an pechhuak a, naupang kawtha lo 135 an enkawl bawk a ni. ORS-Zn Corner hi hmun 179-ah siam niin kut sil fai dan tha Anganwadi leh school-ah tum 217 entir a ni bawk.