633/2023-2024

Mamit 31st May, 2023 : Vawiin khan Mizoram State Legal Services Authority buatsaihin Awareness on ND&PS Act, Govt. Higher Secondary School zirlaite, Mamit khawpui chhunga YMA Branch aiawhte, Police lama thawkte leh Excise and Narcotics Department-a thawkte nen neih a ni a. Pi Lalthangpuii Pulamte, SP Mamit leh Pu R. Vanlalena, Member Secretary, MSLSA te'n he hun hi an hmanpui.

Pi Lalthangpuii Pulamte, SP Mamit chuan mitinte hian hmelma do tur kan nei vek a, chu chu eng nge kan tih chuan ruihhlo hi a ni a ti. Tunah chuan mipa chauh nilo hmeichhia pawh ruihhlo-a buai kan tam ta em em a, kan hnam ang zawng leh zirlai thalai kan nihna angin kan hmelma do let tura tan la turin kalkhawmte a sawm a ni.

Pu R. Vanlalena, Member Secretary, MSLSA pawhin zirlai kalkhawmte chu a chhe zawng leh a tha zawnga thawk na rual tak inni a, a tha zawnga in kal anih chuan in hma hun thui tak a hril a ni tiin, Mizo thalai abikin mipa kan thi nasa em em a, hei hi a chhan chu ruihhlo vang a ni a ti. Hetiang reng a nih chuan nakin lawkah chuan kan mizo nulate'n pasal neih tur an nei lo mai ang tih hi a hlauhawm hle a, kan ram Mizoram chin ramri-a thapui thawha kan venghim ngam ang hian kil hrang hrang atanga ruihhlo rawn tawlhlut thin lakah pawh thapui thawhin kan venghim tur a ni a ti. Mizo thalaite hi ruihhlo vangin thi phuk phuk reng ila, kan ram leilungah hian tunge cheng ta ang, chu chu tunge pawi ti ang? Kan ram venghim tura ngaihtuahna kan sen a ngai takzet a ni a ti.

He hunah hian Pu Lalmuanzova Pachuau, Lecturer, GMHSS & Asst. Secy, Sub Hqrs YMA chuan 'Effect of drug abuse on the society and the efforts of NGO to curb drug abuse tih thupui hmangin zirtirna a pe a, Pu Laldinpuia Tlau, CJM, Mamit pawhin 'Offence and penalty under ND&PS Act and its related issues' tih thupui hmangin zirtirna a pe bawk.

Vawiin Awareness hi Pu Lalsangzuala Ralte, Asst. Commissioner, Excise & Narcotics, Mamit chuan a kaihruai a, sawihona bakah zawhna leh chhanna hun hman a ni.