632/2023-2024

Aizawl , 31st May 2023: Kawrthah M.U.P Area Committee-in an rel leh ngen angin Tourism Minister Pu Robert Romawia Royte chuan Kawrthah Area M.U.P Member leh a hruaitu mi 36 zet te chu nimin leh vawiin hian Aizawl leh a chhehvela hmun pawimawhte a tlawhpui a.
Nimin khan Lengpui Airport chu Airport hotute phalna lain an fang a. Airport terminal building sak that mek te, Fire Truck lian chi tui litre 10000 pai theiin kangmei a thelh theih dante entir an ni a. Airport Officer kaihhruaiin Bus 2-in runway (tum kawng) pawh an zawh a. Upa te hian ropui an tiin vannei an inti hle a ni.

Nimin vek khan Kawrthah MUP member-te hian High Court building thar an tlawh bawk a. Tourism Minister Pu Robert Romawia Royte pisaah inkawmna leh thingpui inhona Minister hovin an nei a; Tourism Minister chenna in pawh tlawhin Minister nupui Pi Lalrampari Hnamte-in kum upate chu Foreign Towel a pe vek a ni. Tourism Minister chuan Chaltlang Tourist Lodge-ah Upate hi a thleng a, zanriah a kilpui bawk.

Tukin khan Kawrthah Area Upa pawl member- te hian Chief Minister Pu Zoramthanga chu a chenna in ah an tlawh a. Upa pawlte hian khawvel Zofate muan kawnga a hnathawh vangin Thangchhuah diar leh Tawlhloh puan an hlan a ni. Chief Minister Pu Zoramthanga’n tha taka a lo dawnsawn avangin kum upate hi an lawm hle a. Tukin vek khan Aizawl Theological College (ATC) an tlawh bawk.

Programme duan lawk angin Upa pawlte hian Assembly House pawh an fang a; Aizawl Sahuanah hun hlimawm tak an hmang leh a. Sahuan atang hian Rengdil leh Kawrthah panin an chhuak thla leh nghal a ni.

Kawrthah Area Upa Pawl te hian an rawtna tihhlawhtlinsaka senso tumsaktu Pu Robert Romawia Royte te nupa bakah an hmun tlawha thuneitu zawng zawng leh Chief Minister Pu Zoramthanga chungah lawmthu an sawi a. Chaltlang Tourist Lodge enkawltuten duat taka an enkawl avangin an chungah lawmthu an sawi bawk.