631/2023-2024

Aizawl the 31st May 2023: Vawiin khân Mizoram Pollution Control Board (MPCB) hnuaia Mizoram EIACP Hub buatsaihin Chanmari YMA Hall-ah ‘One Day Exhibition on Waste to Wealth’ buatsaih a ni.

He Exhibition hi MPCB Member Secretary Pu C. Lalduhawma chuan hawngin, “Ram changkâng zâwkah chuan bawlhhlawh paih mai mai tur an nei vak tawh lo a, thildang hman tlâk siam nân an hmang leh zêl tawh a, in chhûng hnâwmhnawk eng chi pawh a tawih thei leh tawih thei lote pawh paih nghal mai loa thil dang tangkai zâwka hman nawn leh nachâng kan hriat a pawimawh a, tun atang hian tan kan lâk nghal a ngai ‘’ tih thu a sawi a ni.

‘Waste to Wealth’ tih thupui hmangin thil hluihlâwn tawh paih mai tawh tur ang chi atangin thil tha tak tak leh pawimawh zâwkte siam chhuakin pho chhuah a ni a, mi 71 lai telin item 100 chuang pho chhuah a ni. Exhibition hi sikul zirlai naupang leh mipui thahnem takin tlawhin environment tichhe lo tur leh humhim turin thu intiamkamin (pledge-taking) hun an hmang bawk.

He Waste to Wealth Exhibition hi World Environment Day, 2023 lawmna chi khat atân leh Mission LiFE châwi lârna atâna buatsaih niin District dangahte pawh kalpui mêk zêl a ni a, inelna hrang hrangte siamin June ni 5-ah hian hêng inelna result-te hi puan a ni ang.