635/2023-2024

Hualtu, 31st May, 2023 : PHE Minister, Deputy Chief Minister ni bawk Pu Tawnluia chuan vawiin khan Aizawl khawpui tui hasatna sukiang then (supplement) tura ruahmanna kal mek "Alternate Gravity Water Supply Scheme of Aizawl (AGWSSA)" enfiahin tui khuahna hmun (earthen dam) Hualtu khaw dai, Dilzawl hmun ami chu a tlawh.

AGWSSA hi Aizawl chhim lam chuan hnuai veng thenkhat - Mualpui leh Mission Vengthlang bakah Muallungthu tlang dung khaw hrang hrangte, Zoram Medical College (ZMC) huam telin mihring nuai 2 vel fur ruahtui chhawr tangkai theih hun (thla 5-6) chhung vel chawm thei tura duan a ni a. AGWSSA hi Ministry of DoNER-in NESIDS hnuaia thawh tura a ruahman niin cheng nuai 11730.35 senna tur a ni a, 100% central funding a ni.

Tuikhuahna hmunah hian a hna thawktu contractor te nen inkawmin Pu Tawnluia chuan tuna thlen chinah a thawktute hmalakna lawmawm a tih thu sawiin, Aizawl chhim lam veng chuan hnuai leh Muallungthu tlangdung khua te, Zoram Medical College ten fur tui an tlan theih tur ruahmanna a nih avangin a nghahhlelhawm takzet a ni, a ti a. Hualtu rama Tawi tlang bulthutah tuihna tha tak leh tui khuahna tur hmun remchang tak a lo awm chu lawmawm a tih thu sawiin, Hualtu khaw mipuite chungah lawmthu a sawi a, tuihna humhalh a tihchangtlun zel hi tun dinhmunah chuan kan mawhphurhna lian ber zinga mi a nih avangin mitinin hei hi tihtak zeta kan vei a kan theihna zawn theuhah tan kan lak zel a ngai a ni, a ti a. Hna thawh ngai ang pawh thawh zawh tep tawh niin kumin chhung ngeia Tawi tlang tui hi mipui a chhawr tangkai tur te hnena luan haw thlen tir hman kan tum a ni, a ti.

AGWSSA sak hna thawk tur hian Tender kaltlangin M/S Kram Infracon Pvt. Ltd. and Vikash & Associates (JV), Noida te thlan an ni a. September ni 12, 2019 khan thawh tan niin March, 2024 a zawh hman beisei a ni.

Minister-in vawiina a tlawh tui khuah mek hian Hualtu khaw dai, Dilzawl hmuna Tuikum leh Lunglei lui hnar bakah van ruahtui khawl (rain water harvesting) a ring dawn a, tui khuah (earthen dam) hi metre 14 a sang niin a chhip sei zawng hi metre 75 a ni a, metre 3 in a zau bawk a, a mawng hi metre 82 a zau niin, tuikhuahin a chim chin hi hectare 4.1 a ni a, tui litre maktaduai 74 dawng tura ruahman a ni.

Tuikhuah thlen hma metre 900 velah hian tuikhuah atanga tui lak tihthianghlimna hmunpui "Water Treatment Plant (WTP) " siam a ni a, He WTP hi Rapid Sand Filtration Unit kaltlanga tui thlitfim tura ruahman a ni.

WTP ah hian ni khatah tui litre maktaduai 15 thlitfim theih tura ngaih a ni.

WTP atang hian lei hipna (Gravity) hmaning tui hi lakchhuah a ni ang a, a lakna tur hi pipe inches 18-a lian, kilometre 39 a thui niin Hualtu-Khumtung-Muallungthu dai kaltlangin Muallungthu tlanga tuizem lian litre nuai 15 dawngah nitin tui litre maktaduai 12 chhunluh a ni ang a, hei hian Muallungthu tlangdung khaw hrang hrang bakah Zoram Medical College chawm thei tura ngaih a ni. Muallungthu tlanga tuizem lian thlen hma, Muallungthu kawng peng thuam atangin pipe inches 8-a lian hmangin Trinity Hospital, Silaimual thleng tui litre maktaduai 3 nitin lak phei a nih hnuah pipe inches 5-a lianin Mission Vengthlang tuizem lianah tui litre maktaduai 1 nitin dah a ni ang a, Mualpui tuizem lianah pipe inches 6-a lianin tui litre maktaduai 2 nitin dah luh a ni ang. Tui lak theih hun chhung hi Hualtu rama tui khuah (earthen dam) in ruahtui a khawl theih chhung a ni ang.

Tun dinhmunah tui khuah (earthen dam) sak hna 85% thawh zawh tawh a ni a, Water Treatment Plant sak hna 95%, pipe phum hna 75 % leh tuizem lian sak hna 98% thawh zawh a ni tawh bawk.