Nimin ni 23 May, 2012 chawhnu khan Champhai North Constituency Students’ Association chuan Hnahlan High School-ah Career Clinic an nei a,he hunah hian Champhai District MJA Gen. Secretary Pu F.Lalbiakmawia chuan khuallian niin he hun hi a hmanpui.

MJA Secretary chuan zirlai kalkhawmte hnenah “Harsatna paltlang peih lote chu harsatna hlirin a hmuak thin a ni” tih a sawi a, Lehkha zir hi a hunlai chuan hrehawm hle mahse taima tak leh phur taka lehkha zir te chuan hlawhtlinna an nei thin a, a hun laia zir peihlo te chu an hlawhchham thin a, an pass ve anih pawhin Division hniam takah an pass a, an tan hna hmuh a harsa a, a pawi zia an hriat chuan khua a tlai zo tawh thin a ni, a ti. Pu Biakmawia chuan Zirlaite chu HSLC an pass hnuah an kawng zawh tur thlan fel a ngai tawh thin tih sawiin an kalkawng thlang thiam turin a chah a, mahni tui zawng Subject chauh zir tura chahin midangin a tha an tih avanga mahni tui zawng ni lo Subject la te chu an hlawhtling tak tak thei lo a, an tuina ber subject an lak chuan nuam ti tak leh phur takin lehkha an zir a, hei hian hlawhtlinna a thlen thei thin a ni, a ti bawk.

Pi K.Laldingliani, DIPRO pawhin thutawi sawiin zirlaite chu thiltihna hmun hrang hrangah a hun leh hmun thliar hrang thiam turin a chah a, mi puitling ni tura in zir chho mek an nih avangin a tul hunah chuan zak lo thei tur te, mahni tihtur hlen chhuak thiam turte in a chah bawk.