Tarlan tawh angin India ram khawpui hrang hrang thlanchhuah bik cheibawlna tur zingah Aizawl khawpui atana sum ruahman pek chhuah hmasa dawn mek chungchang chu vawiin khan UD&PA Minister leh sorkar mi pawimawh engemawzatin an thlir nawn.

Vawiina UD&PA Minister Pu Zodintluanga office-a thukhawmah hian Parliamentary Secretary to CM Pu Lal Thanzara, PWD Secretary Pu Lalramthanga, PWD Engineer-in-chief Pu Lianchungnunga bakah Finance leh Planning Department hotute leh a kaihhnawih UD &PA Department aiawh te an tel a ni.

Sawihona kaihruaitu Pu Zodintluanga chuan heng sum ruahman zinga dawn hmasak te chu a rang thei ang bera a hmanna tura hman thuai thuai a duh thu sawichhuakin sorkar inkaihhruaina dan leh hrai zawm diak diak a nih dawn chuan hun a duhrei thin dan leh hnathawh hun that laia hma lak tan thuai a duh thu a sawi a. Sorkar Department hrang hrang te pawh kawng awlsam thei ang ber zawng thiam tur leh dan bawhchhe chuang si lova rang taka kutthlak turin a chah a ni.

JNNURM hnuaia Mizoramin sum a hmuh hmasa chu Vaivakawn to Mizoram University kawng tihlen leh siamthatna tur cheng nuai 429.22; khawpui chhung kawng zauhna tur - a thawh khatna atan cheng nuai 871.52 leh Aizawl City Road zinga mi Sihhmui leh University inkar kawng tan cheng nuai 1194.60 te an ni.

Vawiin thukawmah hian Department hrang hrang hotute chuan thil remchang zawka kalpui theih dan tur te Department hrang hranga a tul ang a chak taka bawhzui dan tur kawng te inpawh takin an sawiho a ni.