Nimin ni 23 May, 2012 chawhnu khan Education Minister Pu Lalsawta chuan Hnahlan Grape Winery a tlawh a, Grape Growers Society hruaitu ten Grape rah atanga Zawlaidi an siamchhuah dan chipchiar takin an lo hrilh a, harsatna an tawh chi hrang hrang Minister hnenah hian an lo thlen bawk.

Grape Grower Society hotuten Minister an lo hrilh danin Zawlaidi man hi umkhat Rs. 190 chuang man anih avangin a hralhna lamah harsatna an tawh thu an lo sawi a, tun hnaiah Mizoram Sorkar dawra an zin thu te, tuna Grape tui sawr tawh an la hralh loh Tanky 10 (1,50,000 bottles) vel leh Zawlaidi siamsa Case 1600 an la neih mek chu tihral dan tur an thlen thute sawiin Sorkar pawh he an thu thlenah hian an lo inhawng hle a ni tih an sawi a, Ruahmanna siam anih dan chuan Zawlaidi atanga Sorkar-in V.A.T an lak Bottle khatah Rs. 21.50 chu awl tir (lak loh) tur te, Excise Duty Bottle khata Rs. 10.50 Sorkarin a lak pawh a chanve-a tih hniam an tum thu te, Grape Grower Society pawhin Zawlaidi an siamchhuahna man chiah (production cost) Rs. 82.68 vela an pekchhuah theih tur thu te sawiin hetianga kal theih anih chuan Zawlaidi Bottle khat Rs. 134.50 vela hralh theih tura ruahmanna an siam thu te an lo sawi a, tunah hian Sorkar Order kan nghak mek a ni tih Minister hi an lo hrilh a ni.