Champhai North Constituency Students Union General Assembly vawikhatna chu nimin ni 23 May, 2012 khan Hnahlan Community Hall ah hman a ni a, Education Minister Pu Lalsawta\'n a hmanpui.

Vantlang inkhawm Pu S.Dochhuanawma, Finance Secretary, CNCSU kaihhruaiah hian kumin HSLC Exam-a CNCSU huam chhunga zirlai ti tha ber, Chawngdingliana s/o Ramliana Hnahlan khua (Home Mission School, Aizawl) Mizoram puma 9-na hnenah chawimawina hlan a ni a, an huam chhunga HSLC Exam hnuhnung berah 100% result nei High School 3 awm zinga ti tha ber N.Khawbung H/S hnenah chawimawina hlan a ni bawk.

Khuallian Pu Lalsawta chuan thusawiin Mizoram pumin kan buaipui lian ber chu Zirna hi a ni a, Zirna hi Mizoram atang hian hlep thla ta hlawk ila Mizoram hian chanchin sawi tur kan nei lovang a ti. Mihringte hi Pathianin ama anpuia duh taka a siam kan ni a, chung zingah chuan vawiina zirlai kalkhawmte hi kan tel vek a, zirlai hotu ten in hmakhua zel tur thlira hma an lakte hi theihtawp chhuaha tih hlawhtlin tum turin ka sawm che u a ni, a ti.

Pu Sawta chuan Hnahlan khua hi taima khua in ni a, kut hnathawhah Mizoramah hming in chher tawh a, tukin zingah Hnahlan Br. YMA Treasurer Inah ka lut a, a in sak chu Grape a tharchhuah atanga a sak a ni tih chhuang takin min lo hrilh a, a ropui a, ka rilru a khawih khawp mai.

CNCSU ten an bial chhung zirna hmasawnna atana hma an lakna chu lawmawm a tih thu sawiin Education Minister chuan, lungrual takin thawkho zel ula, theihtawp chhuah rawh u, mahse Politics khelh nan erawh hmang suh u, Politics hmannrua-a in tang anih chuan in hmalakna hian a daih rei lovang tih ka hlau a ni, tia fuihin Khuallian chuan Zirlai pawlte hi Sorkar nawr kaltu, a khalh ngiltu pawimawh a ni thei a, mahse tute hmanrua-ah emaw a tan theih a, sorkar tih mualpho tumna lamah a kal nasat lutuk theih a ni. Education Department hi hetiang tuar nasa ber kan ni a ti bawk.

Education Minister chuan Mizoram sorkarin Zirna lama hma kan sawn theih nan tihdan tha zawk, zirlai thiam theilote pawhin an thiam theihna turin hma kan la mek a, hemi kawngah hian thawk tha ve tawkah kan in ngai a, chu kan hnathawh chu Hnahlan biala zirlaite tan pawh a ni vek a, mi puitling zawk in nih theihna turin hma kan la mek a ni a ti a, CNCSU in Hnahlan-a 10+2 zirna leh HSLC Exam Centre an lo dil chu alo bawhzui tur thu a sawi bawk.

Pu Lalsawta Education Minister hi Aizawl atangin a nupui Pi Lalropari, Pu Lalthakima, Dy. Director, School Education leh Pu Lalsiamthara, Addl. Project Director, SSA Mission ten an rawn zui a, Champhai atangin DEO Pu K,Lalrintluanga, DRC Principal Pu RL.Thianghlima, SDEO Pu C.Lalrizapa, SSA DPC Pu R.Lalthanmawia leh Dy.DPC, RMSA Pu C.Hualrikhuma ten an tawiawm a ni.