Vawiin chawhnu dar 1:00 khan Lunglei South Bialtu MLA, Parliamentary Secretary ni bawk Pu S.Laldingliana chuan Agriculture Department hnuaia Lunglei District chhunga Oil Palm chingtute hnena oil palm tiak sem tur a vai liam.

He huna thusawitu Pu S.Laldingliana chuan tlangram lo neih avanga ram tih chereu zelin ecological balance a tih buai dante leh hemi avanga harsatna tawh hrang hrangte tarlangin he eizawnna kalphung hi thlak a ngaih thu a sawi. Hetiang a nih lai kara hetianga Oil palm chinna kalpui a ni thei ta hi a ropui a tih thu a sawi a. Thawktute inpekna pawh fakawm tiin Kuthnathawktute pawh heng sawrkar hmalakna te hi ti hlawhtlingtu ni tura theihtawp chhuah tur leh, rinawmna leh taimakna nena theihtawp chhuah turin a chah a ni.

He oil palm flag off programme hi Ruchi oil palm Nursery, Rotlang West hmunah neih a ni a. He hunah hian Ruchi Soya Industries ltd. ten oil Palm project kalphung leh hmalakna kal lai mek te Powerpoint Presentation hmangin an entir a. He programme hi Pu Lalnunzira, DAO lunglei chuan a kaihruai a. He hunah hian Dr. David Fangzauva AEO Lunglei chuan technical report a pe a. Vawiin a Oil palm tiak, vai liam tak te hi Lungrang, Pangtlang, Lungsen chhunga mi 200 te tan sem hmasak a ni ang. He project huam khaw 35 atangin beneficiaries 900 velan awm a. tun an sem chhuah bakah hian oil Palm sem hmabak hi 61,740 ala awm a ni.