Vawiin khan Kolasib-ah Turnipui Daily Newspaper buatsaihin Kolasib District pum huap Primary School naupangte tan Drawing Competition neih a ni a. Pu Lalrambuatsaiha, Sub Divisional Education Officer (SDEO) Kolasib chuan a hawng a ni.

Govt. Primary School - I, Kolasib Hmarveng -ah he Competition hi hawngin Pu Lalrambuatsaiha chuan hetianga Turnipui Daily Newspaper in naupangte talent haichhuahna tura inelna thianghlim a buatsaih chu lawmawm a tih thu leh hei hian naupangte ah pawh phurna nasa tak a siam thu a sawi a. Thil tha tiho tura a kaihhnawih pawl hrang hrang lungrual taka an thawkho chu fakin he programme hi zirna kalphung thar nen pawh a inrem hle a ni, a ti. Drawing hi zirna peng pawimawh tak a ni a. School of Arts leh school of Engineering ahte pawh drawing tello chuan zirna hi a kim lo a ni, a ti a ni.

Hawnna inkhawm hi Pu S. Lalhmachhuana, Editor & Publisher Turnipui Daily Newspaper chuan a kaihruai a, Pu H.D. Darrobuanga, Secretary Mizoram Primary Teachers’ Association Sub Hqrs Kolasib chuan inhmelhriattirna leh report a pe a, SSA pipe band Kolasib ten hla an rem bawk.

He drawing competition hi Kolasib District pum huap ang chuan a vawikhatna a ni a. Turnipui Daily Newspaper bakah hian SSA Mission Kolasib District, MPTA Sub Hqrs, Kolasib & Kawnpui bakah MZP Kolasib ten tangrualin hei hi an buatsaih a ni.

Competition ah hian Kolasib District chhunga Primary school 70-ah inelna neih a ni a, school naupang 3900 hetah hian an tel a. Naupangte hian an duh apiang lem pahnih an ziak a. Class tinah lawmman pakhatna atanga pathumna siam a ni dawn a, hun remchang hmasa berah lawmman semna hun hi buatsaih leh a ni dawn a ni.