Mizorama College zirtirtute inzawmkhawmna pawl Mizoram College Teachers' Association (MCTA) vawiin khan IASE Conference Hall, Republic Veng-ah 37^th MCTA Annual General Conference an hmang a. He hunah hian thu pawimawhte an rel bakah Mizoram Journalists' Association (MJA) hruaitute kaihhruaina in kum 2015-2017 chhunga an pawl hruaitu turte an thlang thar bawk.

Pu K. Lal Nghinglova, IAS, Commissioner & Secretary, Higher & Technical Education khuallian chuan  Standards and Qualitative Improvement chungchanga hmalak dan thuah college thenkhatin entawn tlak khawpa an tih that laiin college thenkhatin NIL report an pe chu vanduaithlak a tih thu a sawi a. Mizoram sorkar hnuaia college zirtirtute zingah Career Assurance Scheme kaltlangin Professor 13 zet an awm ta chu lawmawm a tih thu leh midangte pawh tan la zel turin a fuih a. RUSA ah leh All India Survey on Higher Education (AISHE) ah thawktute thawhrimna zarah Mizoram chu a titha ber zinga mi an ni chho ta chu lawmawm a tih thu sawiin B.Ed, zirna hmun IASE hmasawnna ah lawmthu a sawi bawk a ni.

Commissioner chuan College Principal ten hmasawn zawngin college an siam danglam theih zia a mit ngei a a hmuh thu a sawi a. Principal tha awmna ah mathei lovin college-in hma a sawn ngei ngei tiin college Principal-te chu tun aia tan la turin a fuih a. Private Institution thenkhatin Biometric Attendance hmanga thawktute attendance an vil theih tawh laia sorkar college ten tun thlenga an la ti ve thei lo chu pawi a tih thu leh faina kawngah Sorkar College ten Private Institution an tluk lo anga a lan thu leh tanlak nasat a tul thu pawh a sawi bawk a ni.

He inkhawmpuiah hian MCTA Teacher's Award hmasa ber chu Dr. Lalthansangi, Associate Professor, Govt. Aizawl College hnenah hian a ni a. MCTA lehkhabu thar Concerns of Higher Education in Mizoram tih leh MCTA Directory thar chu Pu R. Lalrosanga, Director, H&TE in a tlangzarh bawk a ni.