Pu John Rotluangliana, Tourism Minister chuan ni thum awh tur Thalfavang Kut 2015, 10th December, 2015 atanga 13th, Dec.2015,Tuirial Airfield a hman chu vawiin khan a hawng. Hawnna inkhawm hi Pu T.T Zothansanga, Parliamentary Secretary, Tourism Department chuan a kaihruai.

Hawnna inkhawmah hian Minister chuan thusawiin Thalfavang Kut hmangtu zawng zawngte kut chibai bukin hlim taka kut hmang turin a chah a. Thil hrechiang manglo ten Mizoram Sawrkarin sum harsatna a tawh mek laia hetiang atana sum seng ralah ngaiin an sawisel fo va, Thalfavang Kut hmanna senso hi Mizoram Sawrkar sum a ni lova, Central sawrkar, Ministry of Tourism sum min pek hmanga buatsaih a ni ati.

Mizote hi kan hunte hanthawhna a hmang nasa tak hnam kan nih avangin intihhlimna hun te kan nei mang lova, mitin huap zo hetiang hun kan nei hi a vanneihthlak takzet a, chutih rual chuan kan hlimnate hi mite tana harsatna thlentu atan kan hmang tur a ni lo, tiin Thalfavang Kut hmangtu zawng zawngte a chah bawk a ni.

Nithum awh tur, Thalfavang Kut-ah hian Hnam lam chi hrang hrang te, Ei leh In duh zawng zawng ei theihna tur Food Court, Paragliding, Aeromodel, Power hang Glider, Hot Air Ballon, MIMSA (Two Wheeler intlansiak) te leh thil chi hrang hrang hmuhnawm tak tak en tur a awm a, chawhnu dar 2 : 30 atangin Live Band ngaihthlak tur a awm ziah dawn bawk a ni.

Vawiin Thalfavang Kut 2015 hawnna hunah hian Pu R.Lalrinawma, Deputy Speaker, Pu V.Lalremthanga, IAS, Secretary, Tourism, Pu Vabeiha Hlychho, Director, Tourism Department, Minister nupui Pi Vanlalhruaii bakah officials engemaw zat an tel a ni.