No.2691/2021-2022

Aizawl, the 22nd October 2021 : Vawiin khan Commerce & Industries Minister Dr. R. Lalthangliana hovin Secretariat Conference Hall, MINECO ah tualtah puan handloom, them thil siam handicrafts leh mau hmanga thil siamchhuah chungchangah thil kalpui mek leh hmalakna thar awm thei te sawiho a ni. Industrial Development Board Vice Chairman Pu C. Ramhluna pawh he meeting ah hian a tel a ni.

Dr. R. Lalthangliana chuan hripui lengin kawng tinrengin sum leh pai dinhmun leh sum dehchhuahna a bik takin industry leh a kaihhnawih te a khawih buai nasa a, hmalak a har a, chuvangin awlsam deuh leh rang taka thil tih theih hlawhtling ngei ngei tur thil tlemte, sector 2 emaw 3 emaw a inthlurbinga hma lak a tul tih a sawi a. Tualtah puan, them thil siam leh mau hmanga thil siamchhuah lama hmalakna thar ngaihtuah tura meeting chu koh anih thu tarlangin thla hmasa a Delhi lama Ministry of Textiles leh Ministry of Micro, Small & Medium Enterprises te a dawrnaah hmalakna thar awm thei nia a hmuh thu leh heng Ministry te pawh an in hawn thu meeting ah hian a sawi a. Chutiang zulzuia hmalakna tur Concept Note leh DPR te rang taka siam turin meeting a tel Commerce & Industries officer te leh Bamboo Development Agency (BDA) hnathawk te chu a chah a. Proposal an siamah eizawnna tling a ni em tih te, hralhchhuahna market a awm tha em tih te leh eizawnna thar engzah nge a siamchhuah theih tih te chu ngaipawimawh turin a chah bawk a ni.

Meeting ah hian Commerce & Industries Department hnuaia Handloom leh Handicrafts enkawltu officer ten scheme an kalpui mek dinhmun te tarlangin hmalakna thar awm thei nia a ngaih te an sawi zau a. BDA lamin mau hmanga thil siamchhuahna lamah hmalakna an neih te an sawi lang bawk a. Heng Sector 3 a hmalakna thar awm thei te chu zau taka sawiho a ni a. Meeting ah hian nikum atanga hripui leng avanga inkharkhipna tum engmaw zat neih avanga puantaha eizawngtute harsatna tawh mek pawh sawilan a ni.

Meeting ah hian Commissioner & Secretary Commerce & Industries Pi Esther Lalruatkimi; Director, Commerce & Industries Pi Florence Zotluangpuii, Department officer dangte, MKVI, ZOHANDCO leh BDA aiawhte an tel a ni.