No.2690/2021-2022

Aizawl Khuangchawi thla ni 22, 2021: Mizoram Youth Commission (MYC)-in thalai, phai lama hna thawka awm, COVID-19 hri leng vanga Mizorama lo haw, hna thawh tur mamawhte'n eizawnna an neih theih nana thiam thil chi hrang hrang zirtirna (training) a ruahman zinga pakhat, MYC, Medhavi Foundation leh Lawngtlai District Skill Committee te tang ho huaihawta Lawngtlaia ni 10 awh cake baking training buatsaih chu vawiin khan Lawngtlai DC Conference Hall-ah a kharna hun hman a ni.

Training kharna hun tawi buatsaiha Khuallian, Lawngtlai Additional Deputy Commissioner Pu James Miahlung chuan Lawngtlai District thalaite tana cake ur zirna training buatsaiha zirlai zawng zawngin tha taka an zo thei chu lawmawm a tih thu a sawi a. Training hlawhtlin nana buaipuitute, training petu Medhavi Foundation leh training-a tel zirlaite chungah lawm thu sawiin, zir chhuakte chu an thil zirte tangkai taka hmang a, Lawngtlai District tihmasawntu nih tum turin a chah a. Taihmakna leh thawh rimna chu hlawhtlinna bul a ni tih hre reng turin a fuih a ni.

Training kharna hun hi Lawngtlai Sub-Divisional Officer (Sadar) Pi TT Beikhaizi chuan kaihruaiin, inlawmna thu a sawi a. District Industries Centre-a Functional Manager Pu C. Dokulha'n thu a sawi bakah, trainer-te hnen atangin report leh trainee-te hnen atangin thu sawi ngaihthlak a ni a, training chhuakte'n cake an ur chu zai a ni bawk.

He cake baking training hi October ni 13, 2021 khan tan niin, AOC Veng YLA Hall-ah leh DRDA Conference Hall-ah te training hi kalpui a ni a. Zirlai 21 te'n training hi beiin, zirlaite hi kum 20 leh kum 47 inkar mi an ni hlawm a. Medhavi Foundation te'n Skills Development Corporation-in Level 3 training a ruahman anga training hi pein, exam pawh buatsaih nghal a ni a. Mark 100-ah mark 70 chu pass mark niin, tun tuma training-te hian tha takin an zo vek a. Grade A hmu mi 9, Grade B hmu mi 11 leh Grade C hmu mi 1 awmin, certificate pawh hlan nghal an ni.