Vawiin khan Secretariat Conference Hall-ah Commerce & Industries Minister Dr. R. Lalthangliana hovin Prime Minister’s Employment Generation Programme (PMGEP) chungchanga sawrkar kum kallai mek, 2018-19 chhunga hma laktawhna thlir ho a ni a,he scheme kalpuina kawnga implementing agency leh bank ten’a PMEGP loan an pekchhuah kawnga harsatna an tawh te chhipchhiar takin sawiho a ni bawk.

Commerce & Industries Minister Dr. R. Lalthangliana chuan PMGEP chu scheme malsawm tak, abik takin khawpuia thalai lehkhathiam ten’a eizawnna ngelnget an nei theih nana, kawng tha tak siamsak thei thil a ni, a ti a. Sawrkar flagship programme SEDP nen pawha, state sawrkar sum ti hek lova  project behchanin a kalpui thei nia a hriat thu sawiin hemi atan ngaituahna sen a, hma lakna awm thei te remchang hmasa berah KVIC hotute a sawipui tur thu a sawi tel bawk a. Bank ten’a PMEGP loan an pekchhuah chu target ngaituahin a tlem hle a, hei hi a pawi a, harsatna in neih te sukiang turin vawiina meeting hi koh ani a, in harsatna neih te zau takin sawi ula, a thei ang angin puih che u ka in huam reng a ni, a ti a. PMEGP chungchanga hmalakna hi a khat tawkin kan thlir ho zel dawn a, chumi atan meeting hi kan ko leh thuai ang a ti bawk a. PMEGP chu tun aia, a hlawhtling zawk thei nan leh thalai lehkhathiam ten eizawnna tha an nei thei nan, loan pekchhuah kawnga tun aia chaka hma la turin meeting a tel bank aiawhte a chah bawk a ni.

Meeting ah KVIC, MKVIB hma lakna te, target ngaituaha PMEGP thlen chin te, Bank hrang hrang hmalakna leh an harsatna tawh te ngaihtlak a ni a. MCAB leh MRB ten PMEGP loan pek chhuah chungchanga loan insurance-a Credit Guarantee Fund Trust for Micro and Small Enterprises (CGTMSE) Member an nih ve loh vanga harsatna an tawh chu Minister hian a thei angin hemi thilah thuneitute, dawr turin Commerce & Industries Department aiawhte a hrilh a. KVIC atanga margin money an dawn loh avanga bank harsatna tawh pawh thuneitu te ziaka hriattir nawn leh turin Department hotute a chah bawk a ni.

Commerce & Industries Secretary Pu Zothan Khuma chuan achievement chhiatna chhan lian tak pakhat chu bank ten sawrkar kum tawp dawna PMEGP loan an buaipui avang a ni a, hetiang ti lovin a lut hmasa apiang chu tihfel zel nise chuan kan achievement hi hei aiin a sang fe thei a ni, a ti. Loan la rul tha lo avanga Bank ten NPA chungchanga harsatna an tawh chu engemaw chen Mizoram Public Demands Recovery Act hmanga sutkian thei nia a hriat thu Commerce & Industries Department, Director Pu J. Hmingthanmawia chuan sawiin, chu chu Bank ten lo enchian se tiin Bank aiawh, he meeting a tel te chu a chah a ni. Kum 2018-19 ah Target 818 tuk anih lain achievement (09.01.2019thleng) 188 chauh a ni a, hei hi za zelah 14.50 chauh a ni a. Kum 2017-18 chhunga target chu 623 niin 547 achievement a awm a, chu chu za zelah 54.92 a ni a. Kum 2016-17 chhunga target chu 1034 niin 602 achievement a awm a, chu chu za zelah 48.17 a ni.

PMEGP ah hian Khadi & Village Industries Commission(KVIC) hi a nodal agency a ni a. Mizoram ah chuan KVIC state office in an buaipui a, engemaw chen MKVIB leh DIC ten an buaipui bawk a, Mizoram Bank hrang hrang 25 te chu PMEGP loan target pek ani a, bank thenkhatin tha taka an pekchhuah lain bank thenkhat te chu PMEGP loan la pechhuak miah lote an awm bawk ani.

Meeting ah hian Commerce & Industries Department Secretary Pu Zothan Khuma, Director Pu J.Hmingthanmawia, Lead Bank aiawh, Bank hrang hrang aiawhte, KVIC(State Office) leh MKVIB hotute an tel bawk a ni.