Vawiin chawhnu khan Commerce & Industries Minister Pisaah a tum khatna atan Industrial Development Board an thukhawm a, Dr R Lalthangliana, Commerce & Industries department Minister leh Industrial Development Board Chairman ni bawk chuan he hun hi kaihruaiin Mizoram chhunga Industry hrang hrang hmasawnna atana hma lak dan tur leh thalai hna neilote tan eizawnna tha siam sak dan tur sawiho a ni.

Minister Dr R Lalthangliana chuan,” Kan ram chhung a thil kan thar chhuahte hi hlut thiam ila, ram pawn ami lakluh ngai lova kan ram chhung atang ngei a kan siam chhuah thilte hi chawisang thiam ang u,” a ti a,”Thalai lehkha thiam tam tak hna thawh tur fumfe nei si lote hma khua hi he Industrial Development Board hmang hian chak zawka an hna ngaihtuah sak hi a tum pawimawh tak pakhat a ni,” a ti bawk.

Pu R Lalramnghaka, Secretary, Commerce & Industries department chuan PMEGP diltu ten bank nena an indawrna kawnga harsatna awm thin te sawi langin, heng harsatnate sutkian anih theihnan sawrkar lama hmalakna awmte a tar langa, margin money ringawt beiseia loan diltu an awm thin chu pawi a tih thu sawiin hemi chungchanga zirtirna tha inpek kawngah hmalak a tul thu a sawi bawk.

He hunah Pu J Hmingthanmawia, Director, Commerece & Industries Department chuan Mizoram chhunga Industry hrang hrang dinhmunte tar langin, Industrial Unit inziaklut 9196 awm zingah Manufacturing Unit 6862 leh Servicing Unit 2334 a awm thu a sawi a, Industrial Area sawrkarin a neih hrang hrangte chu SEDP Entreupreneurs-ten tangkai taka an hman theih nan hmalak anih tur thu a sawi bawk a ni.

Industrial Development Board ah hian Commerce & Industries Minister Dr R Lalthangliana chu Chairman a ni a, Vice-Chairman Pu C Ramhluna, Ex MLA leh Secretary Pu R Lalramnghaka te an ni a, memberte chu

1) Pu J.Hmingthanmawia, Director, Commerce & Industries Department
2) Pu K. Lalsawmzuala
3) Pu Lalrinenga Sailo, Ex Councillor, AMC, Durtlang N
4) Dr. Lallenmawia, Luangmual
5) Pu Laldula Sailo, OSD, KVIC
6) Dr. Laldinliana Varte, Asst. Professor, MZU
7) President, Central Young Mizo Association
8) Pu Lalhmachhuana, Zobawm Industry, Kulikawn, Aizawl
9) Col. Lalrawnliana, Ex MLA, Tuikhuahtlang, Aizawl
10) Pu H. Lalremruata, Farm Veng, Lunglei
11) Pu Lalchhuana, Bazar Veng, Hnahthial
12) Pu J. Lalchhanhima, Chawnpui, Aizawl te an ni.