Vawiin chawhnu khan Information and Communication Technology Minister Pu Robert Romawia Royte chuan  Kum 2019 MBSE Exam buatsaiha HSLC leh HSSLC (Arts, Science, Commerce) Topper lawmpuina Laptop Acer A315 leh lawmpuina Certificate Vanapa Hall-ah semna hun a hmang a, he hunah hian Social Media Awareness Programme neih nghal a ni.

Information and Communication Technology Minister Pu Robert Romawia Royte chuan tunlai khawvelah thiamna leh zirna tha neih hi thil hlu ber a ni, a ti a. Hlawhtling tur chuan hun awl hman that leh thahnemngaihna neih hi a pawimawh ber a, vawiina sawrkar chawimawina leh laptop dawngtu topper mi 55 te pawh hian hun awl an hman that vangin, an zirlaiah midangte aiin hlawhtlinna an nei sang bik a ni, tiin a sawi a. Topper te chu an thiamna te ram leh hnam rawngbawlna atana an hman theihna turin, vawiin hian ‘hualna’ kan nei tih entirnan laptop te hi pek an ni, a ti a. Tun hnaiah thluak hmanga inelnaah Mizo te tan thar a ngai tak zet a, tih tak takna nun neih a, beihpui thlak a ngai a; taima, zir nasa leh mi hlawhtling nih tum chu a tlo ber a, ram tan pawh chung mite chu rohlu an ni, tiin a sawi a. Competitive Exam hrang hrangah Mizo thalaite hnam dangin min lehpel mek a, tih tak zeta thalaiten zirnaah tanlak thar a ngai a ni, a ti bawk a ni. Minister Pu Robert Romawia Royte chuan vawiina ICT Department programme hian zirlaite fuihin tiphur se, an thiamna neihte chu Pathianin mihringa a dah a ni a, tihpung zel chu an mawhphurhna a ni, tiin a sawi a. Taihmak leh tumruhnain thiamna a tipung thin a; ram leh hnam, mahni leh chhungkua pawh hmasawn nan thiamna a pawimawh a, zirlaiten nasa lehzualin an zirlaite zir turin a fuih a ni.

ICT Minister chuan khawvel changkang zelah Social Media mitinin an hmang tawh a, mi thenkhatin mi pawisawilo leh an huatzawngte beih nan Social media an hmang fova, hetiang mite hi Mizo mipuiin ngaihnep nachang hriat a pawimawha, mi thatlohna leh mi chhiatna zawng ngar ngar hovin ram an siam tha ngai lova, mi tana thil tha ngaihtuaha phurna nena hnathawk ten ram an siam tha thin a ni, tiin a sawi a ni.

ICT Department Special Secretary, Pi Sakshi Mittal, IAS chuan kalkhawmte lawmna thu sawiin ICT Secretary, Pu Amjad Tak, IAS chuan zirlai tithate lawmpuina bakah fuihna thu a sawi a. Social Media Awareness neih nghal a niin Pu Lalengzuala, Informatics Officer-in zirlaite tana Social Media hman dan tur tha leh fimkhurna turte a sawi bawk a ni.

He hunah hian MLA Pu H.Biakzauva, Prof. F.Lalnunmawia, Dr. Vanlaltanpuia te, Chief Informatics Officer, Dr. Lalthlamuana leh midangte an tel a.  Topper-te hi an chhungte bakah an School zirlaipui leh zirtirtuten an tawiawm a, Sawrkar officials eng emaw zat kalin MZP leh MSU Hruaitute pawhin an telpui bawk a ni.