Vawiin hian Serchhip District Committee on Reading Missions 2022 chu an Chairman Pi Sangchhin Chinzah, Bawrhsap ni bawk hovin an thukhawm a. NITI Aayog lamin District te ti tura a beisei angina Serchhip District ah Reading Month tun July thla chhung hian hman ni se tiin a rel.

India Prime Minister Narendra Modi chuan ni 17th June, 2017 khan Kerela ah 22nd National Level Reading Day leh Reading Month Celebrations a hman pui a. Chutah chuan India khua leh tui te chu lehkha chhiar lama tan la nasa tur leh mipuite thinlunga lehkha chhiar tuina tuha, kum 2022 ral hma ngeia khua leh tui mi harsa zawk maktaduai 300 tal ten lehkha chhiar tam hlutna an hriat ngeina tur hmalakna neih ni se a tih bawhzuina kal zelah NITI Aayog chuan rawtna a siam ta a. Chu rawtna ang chuan Serchhip District ah pawh Lehkha chhiar uar thla (Reading Month) hi kalpui a ni dawn ta a ni. NITI Aayog hian district chhunga institutions awm te leh tlawmngaipawl te nena tangkawpa he thla hi hmang turin a beisei a, an lehkha hmuh hun hi a tlai hret avangin June thlaah khan hman hman a ni ta lo va, chuvang chuan July thlaah hian kalpui mai turin ruahmanna a siam ta a ni.

Reading Month hi High School leh Higher Secondary School hrang hrang ah te hman a ni ang a, lehkha chhiar tam tura inzirtirna leh lehkha chhiar tam lama inelna thianghlim kalpui a ni ang. Tin, YMA Branch, Library nei zawng zawng te pawh an Branch huam chhunga mipuite tan a thlawna lehkhabu hawh theihna remchang lo buatsaih tura beisei an ni a.