3052/2022-2023

Aizawl, 14th December, 2022: Vawiin khan Mizoram Food & Allied Industries Corporation Limited (MIFCO) chu an Chairman Commerce & Industries Minister Dr. R. Lalthangliana kaihhruaina hnuaiah a office chamber-ah board meeting vawi 90-na an nei a ni.

MIFCO chairman Minister Dr. R Lalthangliana chuan meeting thuhmahruiah Mizorama kut hnathawktute tharchhuah hlawk zawka hralh chhuah a nih theihna turin food processing leh vawnhim that (preservation) kawngah nasa takin MIFCO-in hmalakna a nei zel chu lawmawm a tih thu a sawi a. State sawrkar pawhin theihtawp chhuahin kut hnathawktute hamthatna a kalpui zel dawn a, Mizorama tharchhuah te chu tualchhung bakah state pawn thlenga hralhna tur siamsak mek zel an ni a ti. Kut hnathawktute chu ram ei leh bar intodelhna thlentu an nih avangin sawrkarin a ngai pawimawh reng a, kum 5 vel kalta chhung khan MIFCO chuan lakhuihthei leh sapthei thartute hnen atangin a lei reng a, a tam ber hi state pawnah hralh chhuah thin a ni a ti. Mizoram sawrkarin mahni hlawh thawk chhuak tura Corporation din aiin mimal sumdawnna (entrepreneurship) leh pawl (Society, Group etc) te dawm kan, tanpui leh kawng kawhhmuh (facilitate) hian Food processing lamah hmasawnna chak zawk a thlen dawn tih hriain MIFCO chu Mizoram Food Processing Agency (MIFPA) ah thlak turin hma a lak mek thu tar langin, Pradhan Mantri Formalisation of Micro food processing Enterprises (PMFME) Scheme tihhlawhtinna kawngah nasa takin a pui dawn a ni a ti.

Vawiin meeting-ah hian agenda hrang hrang ngaihtuah niin food processing lama hmalakna tur an rel zingah - Commerce & Industries, Agriculture leh Horticulture Department te nen tangrualin Commerce & Industry Secretary kaihhruaina hnuaiah Coordination Committee-din ni se, he Committee hian Agriculture production, supply chain management leh processing atan Mizorama lakhuihthei, sapthei leh thildang tharchhuahte mumal zawka tihral dan kawng a ngaihtuah ang tiin an rel.

Mizoram Food & Allied Industries Corporation Limited (MIFCO) hi ni 19.12.1989 ah Companies Act, 1956 tlawhchhanin, Register of Companies (ROC) Shillong-ah inziak lut a din a ni a, tunah hian a ngheta thawk 21 leh MR 6 an awm mek a ni.