3051/2022-2023
Aizawl, 14th December, 2022: Dt. 8. 12. 2022 (Ningani) khan National Green Tribunal, Principal Bench chuan State hrang hrangte hearing a neih kal chho mekah Mizoram sorkar chu inlan turin a ko a, Mizoram sorkar aiawh hian Chief Secretary, Dr. Renu Sharma a inlan a ni. He hearing-ah hian bawlhhlawh sawngbawl dan chungchanga India ram pumin dan kan hman mek, Solid Waste Management Rules, 2016 hnuaia Mizoram sorkar hmalakna te, Mizoram chhunga lui-te an lo thianghlim zawk nana kan tuichhe sawngbawl dan chungchang te sawi ho a ni a. Hmalakna tur engemaw zat sawi chhuah ni mah se a hranpain NGT hian Mizoram sorkar sum a chawi tir lo.
National Pollution Control Board leh State sorkar atanga report an dawn te uluk taka an en hnuah NGT chuan Mizoram chhunga bawlhhlawh leh tuichhe sawngbawl nan cheng vaibelchhe 50 mamawh nghal a nih thu leh Mizoram sorkar chu a tul anga sum ruahman turin an hriattir a. Hemi denchhen hian Chief Secretary chuan Mizoram sorkarin kum kal meka bawlhhlawh leh tuichhia sawngbawlna tura sum a ruahman dan te a sawifiah a, sum mamawh zat NGT ten an sawi pawh kum kal meka sorkar sum ruahman sain a cover vek thu hrilhin, Sorkar leh mipuite tanrualna zara Mizoramin faina leh bawlhhlawh sawngbawl kawnga hma kan lak dan te chipchiar takin a sawi bawk. Mizoram sorkar hnathawh mek leh ruahmanna hrang hrangte an ngaihthlak hnuah NGT hian Chief Secretary rawtna chu pawm sakin pawisa an chawi tir ta lo a ni. Chutih rualin kum kal meka bawhhlawh leh tuichhia sawngbawlna tura sum ruahman sa hrang hrangte chu uluk lehzuala lo enzui a, lo vil turin Chief Secretary hi an hrilh a ni.
He hearing-ah hian Dr. Renu Sharma hi Pu Naveen Kumar Choudhary, Principal Secretary, EF&CCte, Pu Lalmalsawma Pachuau, Secretary, UD&PAte, Pu Lalremsiama, Secretary, PHE, Pu C. Lalduhawma, Secretary, MSPCB ten an tawiawm a ni.
