3793/2023-2024

Aizawl, 13.02.2024: Tukin khan Commerce & Industries Minister Pu F. Rodingliana chuan Aizawl New Market building thar sak mek chu tlawhin hnathawh a enfiah.

Minister chuan he bazar building sak mek hi mipuite nghawng tak tak thil anih avangin a ngaih pawimawh thu leh chak zawka hnathawh a tul thu a sawi a. Hnathawh mekte uluk taka vil tur leh quality control uluk turin a enkawltu Department te a chah a, Contractor te pawh chak zawka hnathawk tur leh harsatna an neihte chu a tul anga hmalak ho zel turin a ti.

Building sak mek chu a hmangtu tur mipuite tan veivah a awlsam zawk nan leh, chhiatrupna leh rikrum thil a chet a awlsam zawk nan leh building tin inkalpawh theih turin ruahmanna awm tawh sa chu tlema siam danglam Minister chu tha tiin, Department hotute leh engineer ten nen siamdanglam theih dan tur an en ho bawk a. Ruahmanna hmasa zawk aiin stall awm thei zat chu tlem paih a tul thu te sawi niin, mipuite him zawk na tur a nih avangin tih ngei ngei erawh a tul an ti a ni.

Minister chuan Bazar seat leh stall changtu ten midang hnenah an hralh chhawng thin ni a sawi awm chu a ngaih pawimawh thu a sawi a. Commerce & Industries Department thuneitute chu lo enfiah tur a chah in, thil ti diklo an awm chuan allotment cancel sak thlenga hma la turin a hrilh. Hetiang ti thin hria chuan Department thuneitute hnena report turin Minister hian mipuite a ngen bawk a ni.

New Market-ah hian building pahnih – Smart City Mission hnuaia ‘City Centre’ leh Commerce & Industries Department hnuaia sak City Centre Annexe te sak mek a ni a. City Centre Project hi cheng nuai 4035 man niin, he hmunah hian dawr 1105 awm tura ruahman niin Four wheeler 31 leh Two wheeler - 79 dah theih tura ruahman a ni. Cold storage, CCTV, Service lift leh Office te ruahman a ni. Ground Floor leh basement bakah floor 7 awm tura ruahman a ni.

City Centre Annexe building sak mek hi cheng nuai 3641.59 man a ni a, dawr 135 awm a Hawkers 183 thu thei tura ruahman a ni. Two wheeler 219 leh Four wheeler 69 dahna bakah staff quarters engemawzat sak tur a ni bawk a ni.

Minister Pu F Rodingliana hi Pu Isak Malsawma, Chairman, MAMCO, Pi Florence Zotluangpuii, Director, Commerce & Industries Department, Pu CC Lalchuangkima, CEO Smart City Project leh official dangten tawiawm in, building satu contractor te pawh an awm bawk a ni.