3753/2023-2024

Aizawl, the 9th February, 2024: Startup India leh Mizoram Startup Mission-te tangkawp buatsaih Accelerating Startup Callibre & Entrepreneurial Drive (ASCEND) Financial Literacy Bootcamp, Mizoram Edition, Mc Cabe Hall, Aijal Club-a neih chu vawiin chawhma dar 10:30 khan Commerce & Industries Minister Pu F. Rodingliana chuan khuallian niin a hmanpui.

Khuallian Pu F. Rodingliana chuan Mizoram tana pawimawh tak entrepreneurship chungchanga hriat tulte inzirtirna hun ASCEND Financial Literacy Bootcamp buatsaih a ni chu lawmawm a tin thu sawiin, Mizoram tana tangkai tur leh chhawrnahawm tak tur a ni, a ti a. Start-up a nih angin ropui taka bultan a kawk lo a ni tiin, thalai kalkhawmte chu hniam taka bultana rei tak ding thei tura ngaihtuahna seng turin a fuih a. Entrepreneurship lamah Mizoram chu bultan tir leh hma la chho ve mek zel a nih thu sawiin, sawrkarin 'Bana Kaih - Hand Holding Policy' a ngaihpawimawh thu sawiin, sawrkar laipui scheme-te nena tangkawpin he policy hi kalpui tum a ni, a ti bawk.

Commerce & Industries Minister chuan Mizoramin ram tha tak a neih thu leh bultana hmalakna tur ram awl zau zawk nei tura ngaihtuah hman a tul thu sawiin, thalai kalkhawmte chu ngaihtuahna thar nei a, hmasawn tuma theihtawp chhuah turin a fuih a. Policy pawimawh hrang hrangte mipuite'n zau zawka an hriat theih nan sawrkarin ngaihtuahna a sen mek thu a sawi bawk a. Hmalakna reng rengah sawrkarin thawhhona a ngaihpawimawh thu pawh sawiin, bootcamp chhimtute chu mithiam tak takte zirtirna tha taka ngaithlaa tangkaipui tum theuh turin a chah a ni.

He hunah hian Pu Lalmalsawma Pachuau, Secretary, Planning & Programme Implementation (P&PI) Department chuan kalkhawmte lawmna thu sawiin, ASCEND Financial Literacy Bootcamp chu Mizoram tana mellung pawimawh tak a nih ngei a beisei thu a sawi a. Pi Chingthanmawii Guite, Deputy Adviser-cum-Deputy Secretary, P&PI Department hnen atangin bootcamp neih chhan leh Mizoram Startup Mission chanchin tlangpui ngaihthlak a ni a. Startup India (SUI) Team-te'n Startup India chanchin tlangpui, hlawkna leh hamthatna awmte an tarlang a. Dr. Pramod Kumar Joshi, Chief Mentor of GLA University Entrepreneurship Cell-in hlawhtlinna chang tura entrepreneur-te kawngzawh dan tlangpui a sawifiah bawk.

Pu Mukesh Khanna leh Pu Vivek Sovasaria, Tally Solutions te'n account vawn leh enkawl dan chungchangah zirtirna an pe a. Pu Manish Bansal, Managing Director, India Operations at University of Maryland - Robert H Smith School of Business-in mahni kutkawih sumdawnna kaltlanga hlawkna tel thei tura zinkawng zawh ngai leh pawimawhte a sawifiah bawk a. Zawhna leh chhanna hunte hman niin, bootcamp hlawk thlak tak hman a ni.

Entrepreneurship Development Scheme (EDS) chak zawka kalpui turin P&PI Department, Mizoram hnuaiah kum 2017 khan Entrepreneurship Development Centre (EDC) din niin, August ni 30, 2022 ah khan Mizoram Startup Mission ti a thlak a ni a. Hemi kaltlang hian entrepreneurship tihhmasawn leh chawisan kawngah theihtawp chhuaha hmalak a ni a. Kum 2017 a EDC din a nih hnuah entrepreneurship hnuaia hmalaknain hma a sawn zel a; hmalakna kaltlang hian DPIIT recognised Startup 22 neih a ni tawh a, Women Entrepreneur 35 te eizawnna ngelnghet nei thei tura chherchhuah an nih tawh bakah hmalakna hrang hrang kaltlangin mi 5,000 chuangin eizawnna an nei tawh a. IT Services, Food Processing Units, Health Services, Textiles, Handloom & Handicrafts-te chu hmalakna  sector langsar zualte a ni.