2549/2024-2025

Champhai, 16th October 2024: Vawiin khan Comerce & Industries Minister Pu F Rodingliana chuan State Handloom Expo - Hathkargha Mela, Champhaia neih chu a hawng a. Adviser to CM, Champhai North bialtu Er. H. Ginzalala leh Champhai South bialtu Lt. Col. Clement Lalhmingthanga te pawhin he hun hi an hmanpui a ni.

Commerce & Industries Minister Pu F Rodingliana chuan Mizote hi hnam naupang kan ni lo tih a lan chiannna chu Handloom a nih thu sawiin kan hnam incheinate chu a tichiang tu an ni, a ti a. Mizoram sawrkar chu hmasawnna kalpui turin a inpeih thawkhat tawh a, mipui lam pawh inpeih chho zel turin Minister hian a ngen a. Ban a Kaih Policy hmangin mipuite khaichhuah sawrkarin a tum mek thu pawh tarlangin Pu F. Rodingliana chuan mipui thawhpuina ṭha tak an hmuh chuan Mizoram hi khaichhuah theih a beisei thu a sawi bawk a ni.

Er. H Ginzalala, Adviser to Chief Minister chuan ZOHANCO chu Mizo culture vawn him zelna tura a kila lung pawimawh tak a nih thu sawiin an pawimawhna mitinin kan hriat deuh deuh a ngaih thu a sawi a. Champhai South bialtu MLA Lt. Col Clement Lalhmingthanga chuan Mizote kutkawih chu ram pum huapa pho chhuah tlak leh eizawnna atana hman theih khawp a rotling a nih thu a sawi ve bawk.

Pu Lalliansawta, ZOHANCO Chairman chuan Mizote chu kut themthiamna lamah theihna sang tak nei an nih thu sawiin handloom leh handicraft lam hi hnam angin kan bawh nasa lo a, heng thilte hi hnam symbol ni thei tur khawpa siam turin ZOHANCO-in a buaipui mek niin a sawi a, “Hnam angin kan theihna kan lantir chhoh a, ram tana chhenfakawm khawpa hmalak a ngai a ni” a ti a. Mahni hnam kutchhuakte tiphuisui a, hmasawn zawnga kalpui zel a pawimawh thu sawiin, he ngaihtuahna hi thalaite rilruah intuh thar se a duh thu a sawi bawk.

State Handloom Expo- Hathkargha Mela hi Aui Garden-a hawnna inkhawmah hian Dr. Lalzirmawia Chhangte, IAS Secretary Commerce & Industries Dept leh Pu C Lalrinmawia, Manager ZOHANCO te pawhin thu an sawi a. Hathkargha Mela ah hian stall 44 a awm a, October ni 29 thleng neih a ni dawn a ni.