2548/2024-2025

Aizawl, the 16th October, 2024: Vawiin khan Mizoram Cooperative Apex Bank Ltd. (MCAB)  bultumin Mizorama Primary Agricultural Credit Societies (PACS) hrang hrang Computerised tawh 25 te tan ni thum awh tur training, Emerald Hotel Conference Hall, Treasury Square, Aizawlah tan a ni.

Training hawnna hun hmanpuitu Mizoram Cooperative Apex Bank Ltd. Chairman Pu Lalnunsanga chuan Mizoramah tha taka PACS kalpui zel a nih theihna tur chuan rinawmna a pawimawh a ni, a ti a. PACS aiawh kalkhawmte chu Mizorama PACS tha thlan chhuah kalkhawm an nih thu leh society-in Mizorama hmasawnna a thlen theih dan midangte kawhhmuhtu tur an nih thu sawiin, Manager leh thawktu kalkhawmte fuihna thu a sawi a ni.

He training-ah hian PACS Manager-te, PACS Computerised Software khawihtute chu koh khawm niin Master Trainers, System Integrator, Satra Services & Solutions Pvt. Ltd atanga lokalte chuan PACS Computerised tawh te’n software chungchanga harsatna an tawhte enpuiin hmalak dan tur an zirtir a ni.

Sawrkar laipui Ministry of Cooperation chuan PACS Computerisation project hi kum 2022 khan bultanin India ram puma Primary Agricultural Credit Societies (PACS) 63000 te khawl changkang zawk hmanga thuamthat (Computerised) nan cheng vaibelchhe 2,516 senna tur a ruahhman a. He project hian a tum ber chu hmun kilkhawr zawka awm te'n Bank hmang kher lova pawisa khawl, loan lak leh pawisa inthawn nana PACS-te an hman tangkai theihna tura tihchangtlun a ni.