2547/2024-2025

Saitual, the 16th October, 2024: Vawiin chawhnu dar 12:30 PM khan DC Conference Room Saitualah District Bawrhsap Dr. Lalngura Tlau kaihhruaiin District Cooperative Development Committee hnuaia sub-committee, Joint Working Committee chu Saitual District hmun hrang hranga cooperative society dinhmun sawi hovin an thukhawm.

Chairman Dr. Lalngura Tlau chuan kal khawmte hnenah lawmthu a sawi a, Saitual district chu hma a sawn zel theih nan PACS chu a tam thei ang ber din tura chak thei ang bera hma lak a tul hle a ni a ti a, thlai chingtute tana hna tha zawk leh hlawk zawk siam a nih zel theih nan line department ten an theihna zawn theuh a theihtawp chhuah zel turin a fuih bawk a ni.

He hunah hian Pi H. Lalhmachhuani, District Development Manager(DDM), NABARD, Champhai chuan PowerPoint presentation hmangin sawi hawnna leh sawi zauna hun a hmang a, "Sahakar-se-Samriddhi" policy (Cooperation through Cooperatives) hnuaiah cooperative society hrang hrang, Primary Agriculture Cooperative Society (PACS) te, dairy leh fisheries lam pawl din sawrkarin rem a tih avanga committee thukhawm an nih thu a sawi. Society inregister hi Saitual district-ah 64 an awm a, heng zingah hian tha taka kalpui 23 awmin, tha vak lo 23 leh kalpui tha lo 18 an awm a ni. Ministry of Co-Operation atanga Saituala khaw thenkhat la din lohna hmuna PACS din thar tur hi 14 an awm bawk.

Sahakar-se-Samriddhi hnuaiah hian heng cooperative society hrang hrang hi kum 5 chhungin India ram chhunga khua (village) zawng zawnga din tum a ni a, Ministry of Cooperation chuan NABARD, National Dairy Development Board leh National Fisheries Development Board te nena tangkawpin Standard Operating Procedure, Margdarshika a siam a, hemi hmang hian kalhmang tlangpui bakah kum 5 chhunga thiltum leh zawh hun tur tur hrang hrang duan nghal vek a ni.

He thutkhawmah hian District Bawrhsap Dr. Lalngura Tlau bakah hian Pi H. Lalhmachhuani, District Development Manager (DDM), NABARD, Saitual District, Pu SK Das, District Co-Operative Officer, Saitual, Pu A Lalhmachhuana, DAO, Pu Jacob Lalmalsawma, DHO, Pu Lalhmangaiha, Manager, MCAB Keifang Branch, Dr H. Vanlalhmangaiha  ; District A.H. & Vety Officer, Pi Deborah Lalnghakmawii, Demonstrator, Fisheries Department te an tel a ni.