2550/2024-2025

Aizawl, the 16th of October, 2024: Vawiin khan Pu Lalnghinglova Hmar, Minister of State, Labour, Employment, Skill Development & Entrepreneurship (LESDE) Department hovin MINECO-a a room-ah LESDE Department official leh Schneider Electric India Foundation (SEIF) aiawhte’n Mizoram-a Industrial Training Institute (ITI) te tihchangtlun dan tur leh, skill development leh entrepreneurship-a Mizo thalaite hmasawnna tur chungchang an sawiho. Mizoram ITI pathum-a laboratory changtlung tak din tura thawhdunna tur (Letter of Intent) chu vawiin vek khan ziah nghal a ni. 

LESDE Department leh SEIF te thawhdunna turah Mizoram-a ITI pathum – Aizawl, Lunglei leh Siaha – a electrical, solar leh Industry automation course zirna tur laboratory changtlung tak din a ni ang a, laboratory din leh tihhmasawn na’na sum mamawh chu SEIF in a tum dawn a ni. Tin, heng course zirtirtu tur ITI a thawk (instructor) te tan SEIF in training a buatsaih ang a, ITI zirlaite tan entrepreneurship training leh awareness session buatsaih thin a ni bawk ang. Bengaluru-a SEIF Entrepreneurship Incubation Centre-ah ITI zirlai tam zawk an intuaihriam theihna’n an thawkdun dawn bawk a ni.

LESDE Minister Pu Lalnghinglova Hmar chuan LESDE Department leh Schneider Electric India Foundation in thawhhona tha tak an nei tur chu lawmawm a tih thu sawiin, ITI bakah College leh zirna in dangah pawh a remchan dan anga la thawhho zel a duh thu a sawi a. Mizo thalaite’n skill ah theihna sang tak an nei a, IndiaSkills Competition hnunhnung berah medal 8 (pariat) la in Northeast State zinga titha ber an ni a. Lyon, France-a WorldSkills Competition, 2024 ah pawh India aiawhin Mizo thalai pahnih an tel tih a sawi a. SEIF aiawhte pawhin ITI piahlamah pawh zau zawka Mizo thalai te hmasawnna’n thawhho zel tha an tih thu an sawi ve bawk a ni. 

LESDE Department leh SEIF te’n Letter of Intent an ziahah hian LESDE Secretary Pu Lalmalsawma Pachuau leh Director Pi Angela Zothanpuii te’n Minister an tawiawm a, SEIF hi Pu Abhimanyu Sahu, Chief Operating Officer hovin Bengaluru, Karnataka atangin an rawn thawk a ni.