2551/2024-2025

Champhai, 16th October 2024: Vawiin khan Pu F. Rodingliana chuan Champhai District chhunga a department enkawl Power & Electricity leh Commerce & Industries hnuaia hmunhma ṭhenkhat a tlawh a. Minister hi Lt. Col Clement Lalhmingthanga, Champhai South bialtu leh Department hotu ten an ṭawiawm a ni.

Pu F. Rodingliana hian Commerce & Industries Department Building, New Champhai te, Champhai Bazarpui leh Zokhawthara C&I Building te a tlawh a. Power & Electricity Department hmunhma (SDO Office) Champhai Electric Veng a mi a tlawh bawk a ni.

Pu F Rodingliana hian Commerce & Industries hmunhma New Champhai a mi leh Champhai Bazarpui te a tlawh a, Department leh khawtlang hruaitute nen Bazar tihchangtlun leh tihhmasawn dan tur an sawiho a ni.

Pu F. Rodingliana hian SDO Office, P&E Department, Electric Veng-a mi pawh tlawhin, Department hotute nen Champhai District-a power supply dinhmunte an sawiho a. P&E Minister chuan nitin khawsakna leh nunphungahte power supply hnianghnar tak neih a tul thu leh a tel lova khawsak a harsat tawh thu sawiin thawktu indaihlohna karah pawh  chhun zan zawma theihtawp an chhuah thin chu fakawm a tih thu a sawi bawk. Minister hian thawktute chu mipuite mamawh leh ṭul an tihte ngaihpawimawh sak hram hram turin a chah bawk a ni.

P&E Minister hi Lt Col Lalhmingthanga, Champhai South bialtu MLA chuan a bial chhung Zion Veng field a 11 KV line ban sawn dan tur a sawipui bawk a. Engineer ten a ṭul anga an enfiah hnuah, hmalak a nih tur thu Minister hian a sawi a ni.