3822/2024-2025

Aizawl dated 16th January 2025: Pu F. Rodingliana, Commerce & Industries Minister chuan Kawlkulh Handloom Pocket leh Ngopa Handloom Pocket huam chhunga puantah a eizawngte tan National Handloom Development Programme (NHDP) hnuai a Puantah In sak tanpuina chu puantah a eizawng mi 48-te hnen ah a hlan.

Centenary Hall, Gatekawn, Kawlkulhah hian Kawlkulh Handloom Pocket hnuai a mi 27 te hnen ah tanpuina hlanna hun hi hman a ni a. Ngopa Handloom Pocket hnuai a beneficiary mi 21 te hnen a tanpuina hlanna hi Teikhang Community Hall-ah hman a ni bawk.  He tanpuina hlanna inkhawm hi Pi Maria C.T. Zuali, IAS, Director, Commerce & Industries Dept. chuan kaihruaiin Pu P.C. Lianchungnunga, Promotion Officer (HTH) hnen atangin Technical Report ngaihthlak a ni a. NHDP hnuai a puantah insak tanpuina mi 48 te hnen ah hian  first installment Rs. 50,000 theuh Minister hian a hlan a ni.

Khuallian Commerce & Industries Minister Pu F.Rodingliana chuan tanpuina dawngtute chu hmathlir thui tak nei turin leh hmalakna an kalpui dan tur uluk tak a chhut hmasa thin turin a fuih a. Hlawhtlinna lian zawk an chan thieh nan Minister chuan mipui mamawh, duh zawng leh hralh nuam tur ngaihtuah tel turin leh an kutchhuakten hmun zau zawk a thlen theihna tur a ruahmanna siam thin a pawimawh thu a sawi. Tanpuina dawngtu Kawlkulh leh Ngopa Handloom Pocket huamchhung a puantahtute chu hmathatna an hmuhte a nih dan tur ang tak a hmang a, hmasawn puitu leh midang tan a entawntlak khawp a hlawhtlinpuitu nih tum theuh turin a chah a. A huho a hmalakna sawt zawk kalpui thiam tur a thawhhona leh tanrualna nei turin a fuih bawk a ni. 

He programme hman zawh hian Pu F Rodingliana hian a bial chhung Ngopa khuaa Police Sub-Division dahna tur a ruahmanna awm chu Police hotute nen Ngopa Chhimveng ah an enho nghal bawk a ni.